Victoria Kaapanda
ONGWEDIVA - Uunafalama mOshitopolwa shaMusati ohawu andjaneke iilonga koyendji, ndhoka odha popiwa kungoloneya gwaMusati Erginus Endjala mepopitho lye lyaakalimo mOshitopolwa oshiwike sha zi ko.
“Ngele ope na ngu ita dhimbulukwa nawa, momushangwa gwandje gwesiku, esiku nda li nda tambula ko okulela ongangoloneya gwaMusati momasiku sho gali 25 Apilili 2015, okwa li nda popi mo kutya ngele esiku limwe Agro Processing Revolution ta ka tameka moNamibia, oku na okutameka moshitopolwa shetu shaMusati”, Endjala ta ti ngaaka.
Endjala ta ti ondjodhi ye ya ningi yoshili, ngashiingeyi oohekta dhevi dhi li 60 odha longekidhwa okukala dha kunwa iikwamboga yi ili noyi ili. Oshikunino shoku eta po iikwamboga ya yooloka kEtunda Green Scheme nayo oya li ya tameke okulonga momasiku sho ga li 15 gaJuli nuumvo, omanga opo tashi ya shi patululwe pambelewa okuza 15 Aguste sigo opetameko lyaSepetemba nuumvo.
Ta gwedh apo ta ti otashi kala enyanyu enene kaakalimo yomoshitopolwa shaMusati, sho tashi ka kala oshikando shotango okulanda iikwambago yilwe mbyoka kaya li mo nale moshitopolwa, naashoka otashi ka hila oshimaliwa shi ye moshilongo nokugandja iilonga koyendji moshilongo ashihe.
“Iikwamboga yilwe ya yooloka natango otayi ka adhika koongamba dhaMahenene hoka ku na natongo oprojeka ya pwa nale noya tegelela ashike iikwamashina mbyoka ya pumbiwapo okuza kuuministeli wokuhumithakomeho nokuyambulapo oongeshefa oonshona, yo yi tameke”,Endjala ta yelitha ngaaka.
Ngoloneya okwa li wo a pandula aanafalama ayehe yomoshitopolwa ta ti otaya etitha oonkondo lela nohaya longo nuudhiginini, unene mboka ya iyamba okutameka uunafalama wiikwamawawa mboka tawu vulu natango okugandja Iilonga koyendji.
Ta gwedha po ta ti okatomeno komOutapi otaka longo nawa lela nonando pe na ngaa oompumbwe dhimwe dha pumbiwa okugwedhwa po, naa shoka otashi ka shonopaleka iimuna mbyoka tayi si kondjala oshowo ongeshefa kayi shune monima.
Endjala okwa li wo a kumagidha aakalimo yaa kale ya tala ashike koshipala shepangelo ashike naya longe kuyo yene.