Omaumbo avali okwa lopotwa a pya po moshikandjohoololo shaNyaanya moshitukulwa shaShikoto oshivike shadja ko.
Omaumbo ayeshe a pya po ina mu xupa omaliko neenduda adishe oda pya po filufilu.
Omukulupe Berta Mwamba womomukunda Onyati okwa hokolola ta ti ove li momhumbwe yoikulya noidjalomwa molwashi omaliko avo aeshe okwa pila mo meumbo.
“Paife ohatu nangala ashike koshi yomiti. Ovatekulu vange ohava i kofikola nondjala,” ta hokolola.
Okwa hokolola ta ti omundilo owa etwa kombiya ya lungwina pefimbo kwa li omutekulu waye umwe ta teleke.
“Okaana oka fiya ombiya pediko ndele ta kai kopomba ka kateka omeva,” Mwamba ta hokolola.
Christofina Ndhila womukunda Omahanene okwa hokolola ta ti omundilo oo wa xwika po eumbo laye nao owa etwa kounona ovo vali tava teleke omusha.
“Inandi hangika mo meumbo pefimbo loshiningwanima. Onda dengelwa ashike ongodi kutya eumbo lange ota li pi po,” ta hokolola.
Oonakuninga oihakanwa yomundilo tava indile moshiwana opo va yambididwe noikulya, oikumbafa noidjalomwa.
Kansela woshikandjohoololo Onyaanya, Gideon Shikomba okwa ti kwau e na ehalo lokuyambidida ovanhu va pilwa omaumbo na kwatafane nombelewa yaye.
Shikomba okwa kumaida ovadali opo va yandje ehongo kounona vavo va takamife omindilo ngeenge tava teleke.