Elelo lodoolopa yaNdangwa ola yandja eenhele detu kovanhu 231 opo va dule okutunga po omaumbo avo vene kolukanda Omashaka.
Ovanhu ova pewa omikanda oshivike sha dja ko da shangwa omadina avo nota di ulike ouyelele kutya eenhele detu odavo vene.
Eepolota da yandjwa omwakwatelwa eenhele detu 37 da pewa ehangano loShack Dwellers Federation.
Pefimbo ta yandje omikanda detu omunambelewawiliki melelo lodoolopa yaNdangwa, Ismael Namgongo okwa ti elelo lodoolopa yaNdangwa ota li lalakanene okukandula po omukundu wovanhu vehe na omalukalwa.
Onghee okwa ti osha fimana ngeenge omunhu e na onhele yaye yedu i li kedina laye mwene opo a dule a tunge po eumbo laye.
Okwa yelifa ta ti ovanhu va pewa eenhele detu okwa li va ninga omaindilo eenhele detu nova kala ve li momusholondodo fiyo tava pewa.
Okwa weda po ta ti natango ove na omusholondodo wovanhu va ninga omaindilo edu ashike otava ka pewa eenhele davo ngeenge muni a mono po onhele yedu imwepo.
Onghee okwa kumaida oshiwana opo shi kale shangungumana fiyo tava pewa edu, ndele haku li ku fila edu vene.
“Edu la pewa ovanhu ota pa kala pena omayakulo ayeshe ngaashi omeva, olusheno noudjuwo,” Namgongo ta ti.
Okwa kumaida ovakalimo opo va tunge omaumbo a kola ita dulu okupepwa po komhepo.
Seblon Andreas a shifika nawa Dj Sebby oye umwe va pewa eenhele detu nota hokolola ta ti okwa pandula elelo lodoolopa yaNdangwa eshi la yandja edu kovakalimo.
“Onda kala alushe nda hala onhele yedu ndi tunge po eumbo lange, onghee paife handi ka tunga eumbo lange shaashi osha fimana ngeenge omunhu e na olukalwa,” ta ti.