OMPUNDJA - Ondoloma yakula yomeva mOmbonde moshitukulwa shaMusati, oyo hai yandje omeva keetenga da fika pomuwoi moshikandjohoololo oya ninga efimbo ihe na omeva.
Ovanambelewa vokoNamwater vati ova hokolola kutya ondoloma oya ninga efimbo itai nane omeva molwaashi ya pwa, yoo opomba imwe yomeepomba dayo vati nayo oya teka.
Ova tumbula yoo kutya ondoloma vati oya tungililwe kovakwashiwana kepangelo, ashike paife efiloshisho layo ola nyika pange apa, unene tuu ngeenge tashi ya pokupangelifa oinima i li ko ya teka, ile omeva a pwa mo.
Ova twikila kutya neudo otava nane unene noudjuu shaashi enota ola nyaa unene kehonga.
Omeva omotenga omo vati ngaashi neudo inaa ada mo shaashi ohai pewa ashike omeva okudilila mokanala, koo okanala nako oke na omeva taa shongola.
Omeva omokanala nao vati ohaa topolelwa eenhele dihapu di li moshitukulwa shaShana. Vati ngeno eshi omeva taa pombelwa motenga okudilila mokanala opo otenga i dule okutwala keetenga edi dishona vati, yoo otai twala vali keenhele dikwao. Kexulilo lefiku vati otenga ohai tulwa ashike omeva a xulila nande opeemeta di li nhatu.
Tangi Lineekela umwe womovanafaalama vomoshitukulwa, okwa tumbula kutya oimuna yavo ngeenge ye ya peetenga domeva, ye ya okunwa ngeno, ohai hange ashike omatemba a kukuta.
“Eetenga nado kadi na omeva, shaashi otenga ei yakula nayo ihai mono vali omeva a wana, opo i dule okushilila mwaadi dishona. Oimuna yetu ihapu oyafya kenota yoo imwe oya tembulwa nale nokuli,” Lineekela ta ti.
Lineekela okwa tumbula yoo kutya vati omwaalu wovanhu meenhele dihapu owa ninga uhapu, shoo osho sha etifa omeva a ninipale meenhele dihapu.
Ngoloneya woshitukulwa Elia Irimari okwa tumbula kutya oshitukulwa oshi na omhumbwe yakula yomeva, shoo vali oshi na omhumbwe yakula yoikwa noipangifo yokuhumbata omeva.
“Ngeenge fyee ohatu nyengwa okukandula po oupyakadi ushona ngaha we lihanena oshitukulwa, ngeenge mbela oyaa makula?” Irimari ta pula.
Okwa tumbula yoo kutya ova hala okulonga mo onghalo yomeva moshitukulwa, opo va dule okulipyadikila yoo vali nomaupyakadi akwao akula.