Opolisi monooli oyili molukongo lwaafuthi mboka ya yugu aathaneki omathano gawo, sho yali yafundjwa anuwa yaka thaneke ohango yaashi yoshili.

Sha ikolelela kolopota yopolisi yiiningwanima ya holoka mehuulilo shiwike oshiningwanima shoka osha holoka mEtitano.

Otaku hokololwa kutya aathaneki mboka okwali ya ndhengelwa ongondhi kutya naya ka thaneke ohango yi li komukunda Ohamboyomuve moshitopolwa shaHangwena, hoka oshimaliwa shawo otaye shi pewa ngele ya mana iilonga yawo.

Aalumentu mboka yaathaneki oya li ya tulwa tango poolefa pOngha, mpoka anuwa yali ya ithanwa komuhingi gumwe ta ti, oteya fala kegumbo hoka kuna ohango.

Omanga anuwa yeli mondjila oya mono taya ulikwa noombele, taya lombwela ya gandje omathano niilongithomwa yawo ayihe.

Anuwa oya tameke oku kondjela iinima yawoshoka sha etitha ya tsuwe noombelelago enene inaya ehamekwa unene.

Iinima ayihe ya kuthwa, mwa kwatelwa oongondhi ndhawo dho peke, oyo ngushu N$25 970. 

Opolisi oya kumagidha oshigwana shi ya yambindhindhe okukonga ko kaafuthi mboka ya longo ngaaka.

Oya pula oshigwana shi lopote kehe ngoka taka monika ta landitha omathano gaana oombapila.

Opolisi natango oya kumagidha aathaneka ya kale aluhe taya kwashipaleke iituthi taya hiywa ku yo ngele oyo shili okuyanda uupyakandhi ngaashi mboka wa holoka. Tayi ti, aafuthi otaya longitha omikalo adhihe okuyuga oshigwana iinima yawo. Shoka hasho oshikando sho tango aathaneki yiituthi ya yugwa iinima yawo.

Pehuulilo lyomumvo gwayi, natango omuthaneki gumwe okwali a yugwa omathano ge mOshakati pethimbo kwali ta zi kohango, kOshinyadhila.

Omulumentu ngoka okwa ti, okwali a thigwa owala, no kwali a thigwa muudhigu oshoka iinima ye ayihe oyali ya yi, omanga muna omathano gaantu giituthi ya yooloka, ga futwa nale.

Ostudio yokuthaneka  ya shiwika nawa “Racio Media”, omumvo gwayi na yo oyali ya teywa, nomathano gondili okwali ga yiwa nago kaafuthi. -vkaapanda@nepc.com.na