Elelo lyondoolopa Helao Nafidi moshitopolwa shaHangwena olya kutha ko oopelesenda 30% kiifuta yokuningulula oonzapo dhethikamepo lyomangeshefelo. 

Mayola gwondoolopa Helao Nafidi Darius Shaalukeni okwa ti ndjika ompito ombwaanawa ya pewa aakalimo yomondoolopa yawo, okuningulula oonzapo dhethikamepo lyoongeshefa dhawo. 

“Ompito ndjika hayo yokweethiwa, onkene kehe ngoka e na ongeshefa na kale e shi ninga omanga omasiku ga tulwa po inaaga thika,’’ ta kumagidha ngaaka. 

Okwa tseyitha kutya, oya gandja ashike sigo omasiku 31 gaMaalitsa nuumvo, naangoka ta ka thika konima yomasiku ngoka, otaka futa oshimaliwa shoka hashi futwa shito. 

Ta ti, elelo lyondoolopa olya gandja ompito ndjoka kaakalimo, sho ya li ya ndhindhilike uunyengwi wa taalelwa kaanangeshefa yamwe momundhingoloko gwawo. 

“Okwa fatulula kutya kehe ehala olyi na okukala lyi na onzapo tayi ulike epitikilo lyokuninga omangeshefelo okuza kelelo lyondoolopa,’’ ta fatulula ngaaka. 

Ta gwedha po kutya elelo lyondoolopa ohali gandja oonzapo ndhoka, okukwashilipaleka kutya omangeshefelo taga ningwa komukalimo gontumba oga pitikwa oshowo pehala mpoka e li. 

Shaalukeni okwa ti elelo lyondoolopa otali tsikile okulongela oshigwana shawo omauwanawa ngaashi naanaa kwa li ya uvanekelwa. 

“Nguka omukalo gokutsakaneka aakalimo ondjilakati opo mboka taya shongola ya vule okuya komeho, sho taya yambidhidhwa,’’ ta fatulula ngaaka. 

O m u n a n g e s h e f a Simon Shi l ombwel e n i ngoka e na okamini oshowo ehala lyomanwino momundhingoloko Helao Nafidi okwa ti onkundana otayi nyuwitha omakutsi. 

“Omp i to nd j i k a h a y o yo kwe e t h iwa unene pethimbo ndika lyoomwedhi dhopetameko, iinakugwanithwa oyindji, oshimaliwa otashi shongola,’’ ta popi ngaaka. 

Ta ti, 30% dhoka ya kuthilwa ko odhindji, notadhi ka gandja ompito ombwaanawa koyendji. Omalelo goondoloopa okuza pehuulilo lyomumvo gwa yi oga kala nokukutha ko kiihohela, opo aakalimo yawo ya vule okufuta omayakulo haya mono. 

Gamwe oga li ga dhimi po oondjo dha kala dha taalela aakalimo, shoka sha li sha nyanyudha unene mboka yaa na iiyemo. 

-vkaapanda@nepc.com.na