Opolisi moshitopolwa shaShikoto oyi li metifa okukonakona oshipotha shaafekelwa yatatu mboka anuwa ya kwata koonkondo omukiintu gwomimvo 27.
Omukuluntu gopolisi moshitopolwa shaShikoto Teopoline Kalompo-Nashikaku okwa ti oshiningwanima shoka osha ningilwe mEtiyali, meni lyokandingosho ke li molukanda Onyati, momudhingoloko gwOnayena. Opolisi oya hokolola kutya omukiintu ngoka taku tiwa oku na uunkundi wopamadhiladhilo, okwa li a yi mokadhingosho, moka a li a adha aalumentu yatatu.
“Gumwe gomaalumentu mboka yatatu okwa li a ponokele omukiintu ngoka, te mu hili moshiya, te mu hula iikutu, ee taye mu kwata koonkondo ayehe yatatu,” ta hokolola ngaaka.
Sho anuwa aalumentu mboka ya li ya mana okulonga shoka ya longo po, oya li ya mbandameke omukiintu ngoka kutya ngele okwa popi shoka a ningilwa ota ye mu dhipaga.
Ta ti, omukiintu sho a yi megumbo okwa thikile ta lombwele yinakulu sho a ningilwa kaalumentu mboka yatatu.
“Aafekelwa yaali otwe ya manga po, omanga omufekelwa omutitatu ina mangwa natango omolwomakonakono gopolisi inaaga pwa,” ta fatulula ngaaka.
Kalompo-Nashikaku okwa kala nokukumagidha oshigwana shi kale tashi lopota iiningwanima tayi ningilwa aanona momagumbo, opo ya kuthe onkatu yomeendelelo.
“Kehe ngoka ta ka holeka oshiningwanima sha ningwa megumbo, kutya ekwatokoonkondo, edhipago oshowo omahepeko galwe, naye otatu ke mu tula konima yekumba,” ta popi ngaaka.
Ta kumagidha kutya oshigwana inashi kala shi na uumbanda okulopota sha kopolisi.
Okwa ndhindhilikwa aantu ye na uulema wopamadhiladhilo ya taalela omahepeko mwa kwatelwa omakwatokoonkondo, oshoka yamwe kaye na nkene ye shi lopote.
Aatonateli yaantu ye na omaulema otaya kumagidhwa ya kale aluhe taye ya sile oshimpwiyu.
Aavali otaya nyenyeta kutya inaya manguluka we okuthiga aanona momagumbo naakwanezimo oshowo aaniilonga. Oya li ya nyenyeta ngaaka okupitila komalungula oshowo miikundaneki ya yooloka sho kwa li kwa lopotwa omakwatokoonkondo ogendji mehuliloshiwike.
Omugandji gomauyelele mUuministeli wuukashikekookantu Lukas Haufiku okwa li a fatulula kutya omakwatokoonkondo ohaga holoka nomatompelo ga yooloka.
Ta ti, shoka otashi vulu okushonopala nenge okuhula po uuna oshigwana tashi tsikile okulongwa nokufatululilwa kombinga yuuthemba wawo, nokutseya shoka ye na okuninga uuna ya longelwa omiyonena dholudhi ndoka. vkaapanda@nepc.com.na