Omukulunhuwiliki moshikondo shouhaku nomayakulo opashiwana Ben Nangombe okwa ti okudja omudo wa dja ko fiyo oneudo moshilongo omwa lopotwa omivalu dovanhu 1 345 va kwatwa kumalaria.
Nangombe okwa ti mokati kaavo va kwatwa komukifi, ovanhu ve li 12 ova xulifa omanga ovanhu 133 va tambulilwa moshipangelo.
Nangombe edi okwe di popya momukandapitifi wa nuninwa okuyandja ouyelele nehongo kombinga yamalaria.
Okwa yelifa ta ti oipangelo i li 15 moshilongo omo mwa lopotwa malaria oyo Eenhana, Okongo, Engela, Onandjokwe, Omuthiya, Tsumeb, Oshakati, Oshikuku, Outapi, Rundu, Andara, Nyangana, Nkurenkuru, Ncamagor, Opuwo noshoyo Katima Mulilo.
Nangombe okwa koleka ta ti Eenhana odo dimwe di na omuvalu uhapu wa kwatwa komalaria, ve li 592, taku landula Katima Mulilo e na ovanaudu ve li 457. “Omivalu dovanhu tava kwatwa kumalaria ohadi hapupala unene pefimbo longhalo yomhepo ngeenge tai lunduluka noha shi eta malaria a tandavele noupu,” ta ti.
Okwa kumaida ovanailonga vouhaku komandiki ouhaku noipangelo a yooloka opo va kwashipaleke kutya malaria ota lwifwa tashi pitile mokuyandja omayakulo ouhaku noshoyo oikwafifo ngaashi eenete deemwe nokupombela momaumbo.
“Ovanhu momidinongo nava pewa ehongo nouyelele kombinga nghene malaria a tandavele noshoyo omadidiliko,” ta ti.
Okwa ti ovanhu ve na omadidiliko oshidu malaria nava lopotwe pefimbo opo va pewa epango lopaunamiti diva.