Epangalo lyaZambia Etiyali olya pititha omushangwa kutya otali gandja omasiku gaali gefudhepo lyiilonga, nomasiku gatatu tali hulilitha omapandela ondjilakati moshilongo okugandja esimaneko oshowo okudhimbulukwa omupresidente kwa li gwaNamibia Hage Geingob.

Momushangwa ngoka gwa pitithwa kepangelo, Amushangandjayi gwokabinete Patrick Kangwa, peha lyepangelo lyaZambia okwa ti okuza Etitatu sigo Etitano omansiku 23 gaFebuluali omapandela oga kala taga huulile ondjilakati, omanga omasiku 24 sigo 25, otashi kala omasiku gefudhepo lyiilonga moZambia.

“Shoka okwa li sha tokolwa opo kugandjwe ompito yesimaneko nokudhimbulukwa omupresidente kwa li Geingob oshowo okuulika uukwawo wanankali,’’ ta fatulula ngaaka.

Oya shanga wo kutya kehe shoka shaa li sha longekidhwa tashi holoka momasiku moka osha kalekwa,notaku ka gongalwa komahala ga yooloka opo kudhimbulukwe omupresidente kwa li gwaNamibia.

Oya totha mo kutya Geingob okwa li omukuluntu gwendiki United Natons  Institute of Namibia (UNIN) koHarare, hoka anuwa Aanamibia oyendji mwa kwatelwa oominista ya li ya mono omadheulo ga yooloka ethimbo oshilongo inaashi manguluka.

Minista gwomauyelele Emma Theofelus okwa londodha oshigwana shaa tandeleke we uuyelele waashi woshili kombinga yomalongekidho gefumbiko lyomupresidente, ihe naya kale aluhe ya tegelela uuyelele tau pitithwa kuuministeli.

‘’Otwa kundana kutya oshigwana oshi na ohokwe yokumona olutu lwomupresidente kwa li, opo lu ende niitopolwa ya yooloka moshilongo ihe shoka itashi nigwa omolwomashongo giiyenditho,” ta fatulula ngaaka.

Ta ti, okwa ningwa omalongekidho okuza kiitopolwa ayihe yaamboka taya ka thika kefumbiko lyomupresidente.

Geingob okwa hulitha momasiku 04 gaFebuluali nuumvo, mepipi lyomimvo 82.

Oshituthidhimbuluko she oshi li ko momasiku 24 nefumbiko otali ningwa momasiku 25 gaFebuluali.

-vkaapanda@nepc.com.na