Victoria Kaapanda

ONGWEDIVA - Omunangeshefa mondoolopa yOutapi, Hai Rong Zhu okwa gandja iikwathitho mokukeelela oshowo okulwitha omukithi gwoCovid-19 yongushu N$3 600 kopolisi moshitopolwa shaMusati.

Zhu ngoka e li omukwashigwana gwaChina, okwa ti okwa koneke kutya aapolisi oyo taya dhana onkandangala onene opo oompango dha tulwa po kepangelo dhi landulwe oshowo dhi simanekwe. Shoka osha li she mu pe edhilaadhilo kutya aapolisi oya pumbwa eyambidhidho opo nayo ya ikeelele pethimbo ndika.

Okwa li a yambidhidha niikalate yoonamunate yi li 10, osho wo oothewa dhokwiiyoga koonyala dholita yimwe dhi li hetatu.
“Okashona hoka twa kwatha nako otwe ka nunina ashike aapolisi yomoshitopolwa shaMusati, nonande inaka gwana natango otandi indile aanangeshefa moshitopolwa shika opo ya yambidhidhe nokashona ye na nenge taya vulu okukwatha nako,” Zhu ta ti ngaaka.

Ta gwedha po ta ti epangelo kali vula okugwanitha po ayihe pethimbo limwe, onkene nalyo olya pumbwa eyambidhidho okuza moshigwana, kehe ngoka ta vulu okugandja shoka e na po, unene tuu aanangeshefa.
Omukuluntu gwopolisi moshitopolwa moka Titus Shikongo okwa ti, ota pandula peha lyaapolisi ayehe, shoka sha ningwa komunangeshefa gwiitungitho, osha simana nonkoondo kaapolisi mboka ye li moshiponga omanga ye li methimbo lyiilonga okutula po omalandulathano  gokukeelela oCovid-19.

“Aapolisi oye li moshiponga, onkene oya pumbwa ikeelelitho ethimbo kehe opo nayo ya igamene komukithi nguka. Omakwatho ngaka otage tu kwatha lela, onkene otandi indile natango aanangeshefa moshitopolwa shetu ya kuthe ko oshiholelwa,” Shikongo a popi ngaaka.

Shikongo okwa gwedha ko ta ti, nonando epato lyoongeshefa oonene noonshona dha yooloka olya kala uupyakadhi kaanangeshefa oyendji, ota pandula sho aakwashigwana ya iyutha koompango dha tulwa po. Shoka tashi ulike kutya aakwashigwana oye uvite ko oshiponga shomukithi tagu keelelwa.