Auleria Wakudumo
Omhangulilo yaMangestalata waNdangwa oya yandja ehandukilo leedula 20 modolongo komusamane weedula 48 eshi vati a kwata keenghono nokuyandja eteelelo komonakadona eedula nhano dapita.
Julius Shinyama okwa kwatelwe po momudo 2020 konima eshi vati a kwata keenghono nokuyandja eteelelo komona oo a li e na eedula 17 pefimbo loshiningwanima.
Okamona vati oka li ka mona okaana, mupya munene oka xulifa moshiponga shomundilo.
Otaku hokololwa Shinyama a kwata keenghono omona oikando ihapu ndele te mu pe eteelelo. Vati okwa kala ha ifana omona monduda yaye yokunangala ndele te mu kwata keenghono oikando ya hanga puivali.
Xe yaShinyama, Matheus Itembu, oo a holoka ongombangi yaye okwa indila omhangu opo i pe omona ehandukilo lopedu shaashi vati oku na oinakuwanifwa ihapu.
Okwa ti vati Shinyama opo a mono oilonga yee oku na ounona omulongo. Oku na omukulukadi iha longo, oimuna novanailonga ovo ha futu.
Ombangi yaye ikwao oya holola kutya ounona vaShinyama vahamano ohava i kofikola natango, okwa kanifa oilonga yaye yomomeva molwoshibofa eshi. Nonande a mona po ikwao imwe, okuudite ta kanifa natango oilonga ei molwoshibofa eshi. Okwa holola yo kutya Shinyama oha file oshisho ovadali vaye.
Shinyama okwa li a holoka komesho omupanguli Mutuku Hamunyera oo a yandja ehandukilo laye.
Ina yanakuningwa oshihakanwa, oo a holoka ongombangi yaye okwa holola kutya oshiningwanima eshi osha shendja onghalamwenyo yomona.
Okwa ti nakuningwa oshihakanwa okwa dja mo mofikola. Okwa tembuka mo meumbo nopoushiinda molwomapopyo ovakwashiwana.
“Oshiningwanima eshi osha eta fiyo nakuningwa oshihakanwa ta mono okaana oko ka xulifa moshiningwanima shomundilo,” ina ta holola.
Okwa ti natango omona oha yi keetundi dexungomwenyo.
Otaku hokololwa oshiningwanima eshi sha ningilwa momukunda Onalunike moshitukulwa shaShikoto momudo 2020.
Omhangu oya holola kutya Shinyama ina holola elitulemo moumbangi oo a yandja komhangu, nomolwaasho ta pewa eedula 20 konima yokakuma.
Omupanguli Hamunyera okwa shivifila Shinyama kutya oku na oufemba wokuninga eindilo komhangu yopombada yoshilongo ngeenge oku li omhinge nehandukilo laye.
Oshiningwanima shikwao, opolifi moshitukulwa shaMusati otai kongo omulumenhu weedula dihe shivike eshi vati a kwata okaana kokamati keedula 12 keenghono.
Eshi osha ningilwa modoolopa yaShifo moRuacana, Osoondaxa lwopotundi 16h00.
Opolifi oya holola kutya okaana oka li ka tumwa kuinakulu pefimbo loshiningwanima.
Omufekelwa vati okushivike kunakuningwa oshihakanwa ashike ina tulwa moipandeko natango.
-wakudumoauleria@gmail.com