Omupresidente Netumbo Nandi- Ndaitwah okwa kumaida ovanafikola opo ve li honge nelitulemo molwashi otava ka ninga ovaleli vokomongula oshoyo ovanashilonga vomaifano a yooloka. 

Edi okwe di popya Etitatu pefimbo kwa li ta patulula pambelewa omuhandjo kofikola Ndoro Memorial School i li koshitukulwa shaZambezi. 

Momuhandjo ota mu kala ovanafikola 320 osho tashi va kwafele opo vaha ende vali oshinano shile ngeenge tava i keetundi. 

Omupesidente okwa ti omuhandjo ou owa kwatelwa momihandjo 13 odo opo ashike ta tungwa paife. 

Okwa yelifa ta ti mopaife ngaha moshilongo omu na eefikola 219 depangelo dina omihandjo dovanafikola ve dulife oma70 000. 

“Epangelo laNamibia ota li twikile okukwashipaleka kutya keefikola okwa tungilwa omihandjo dovanafikola molwashi eshi otashi tu ovanafikola omukumo ve li honge nondjungu,” ta ti. 

Okwa weda po ta ti omihandjofikola oda fimana kovanafikola ovo hava di kokule nofikola shaashi ngeenge omunafikola oha di mofikola nena ote li hongo nawa nokupita noitwa iwa. 

“Ohatu lalakanene opo eefikola dihapu moshilongo di tungilwe omihandjo oshoyo okuyandja omhito yokaana keshe kaye kofikola,” ta ti. 

Nandi-Ndaitwah okwa ti paife ehongo okutameka peendodo dopedu fiyo okondodo onhi-12 ola ninga loshali nelalakano lokukwashipaleka kutya okaana keshe oka i keetundi pehe na omudali teli popile kutya ke na oshimaliwa shokufuta. 

“Neudo oda popya kutya okutameka momudo tau ya ovalihongi itava ka futa vali ngeenge tava ka fikola koiputudilo yopombada,” ta ti. 

Okwa lombwela ovanafikola ta ti ei oyo omhito iwa okukala ve li honga noudinini ndele tava piti opo va dule okuya koiputudilo yopombada ya yooloka. 

Omupresidente okwa kumaida ovadali opo va kufa ombinga okuxwaxwameka ounona vano kombinga yefimano lokuya kofikola. 

“Natu longeleni kumwe hatu sheni opo tu tweni ounona omukumo vaye keetundi,” ta ti. 

fhamalwa@nepc.com.na