OSHAKATI – Omauliko giipindi goshituthi shomazimo tashi ithanwa Oshakati Totem Expo, oga ende nawa.

Omauliko ngoka oga tamekele momasiku 30 gaMei noga hulu Olyomakaya ya zi ko.

Aashingithi ya yooloka mboka ya yi moonkundathana noshifokundaneki shika oya ti oongeshefa dhawo momauliko giipindi odha ende nawa oshoka oshiindingili shoka osha li sha longekidhwa nawa.

Okuza esiku lyotango oya kala ye na omukumo kutya omasiku ngoka ga li ga hupu ko otashi ka enda nawa.

Ndapewa Amupolo ngoka kwa li ta landitha iikunwa niikulya okwa ti, oya pandula elelo lyondoolopa yaShakati oshoka olya li lya longekidhwa nawa, noshimaliwa shoka ya pula osha li shi shi okwiindhindhimikilwa.

“Omahala oge na omalusheno, otwa tendelwa nawa uundjugo wa yela, ihe otwa pulwa ashike N$1 500, omanga iinyangandhalwa ya fa shika ya kala tayi ningwa mOshakati nopoondoolopa dhopuushinda oya li ya pula iimaliwa yi vule po mpoka ihe inayi longekindhwa nawa,” ta popi ngaaka.

Ta gwedha po ta ti, okwa kala nokukutha ombinga momauliko giipindi ga yooloka ga ningwa omumvo nguka, ihe ngaka gomazimo, oga pata ko.

Selma Iyambo ngoka a li ta landitha oondjuhwa dhOshiwambo okwa ti, ookasitoma odha li tadhi ende unene komatango, ngele oyendji ya zimbuka.“Ethimbo lyomutenya ookasitoma okwa li tadhi ende kashona. Thimbo limwe oto adha inoo landitha sha sigo otaku toko, ashike uusiku otwa kala tatu landitha nawa lela,” ta popi ngaaka.

Ta hokolola kutya okuza esiku lyotango e ya momauliko giipindi, okwa landitha oshimaliwa sha kola, shi vulithe shoka ha landitha kehe siku momapandaanda moka ha landithile okuza Omaandaha sigo Olyomakaya.

Soini Amutenya ngoka naye ta landitha iidhanitho yaanona okwa ti, omauliko giipindi ogo ashike taga longithwa kaalandithi paife, oshoka olyo ethimbo aantu ya gongala pehala limwe.

“Komahala getu hoka hatu landithile kaku na we ookasitoma,” ta popi ngaaka.Ta ti, ohaya landula ashike mpoka pe na omauliko giipindi, opo ya vule okulanditha. Omugandji gomauyelele melelo lyondoolopa lyaShakati Katarina Kamari okwa ti, omauliko giipindi gonuumvo oga li ga pata ko.

“Otwa longekindha nawa nomayakulo agehe opo ga li, noshigwana osha kala tashi gandja omukumo sho tashi holoka momwaalu ogundji,” ta ti ngaaka.

Kamari okwa ti omauliko giipindi ngoka okwa li ga longekindhwa oshikando oshi-10.

-vkaapanda@nepc.com.na