Minista gwiilonga niiyenditho Veikko Nekundi okwa indile aakalimo yomomudhingoloko gwOkaku moshitopolwa shaShana opo ya longele kumwe nepangelo miinyangadhalwa tayi eta ehumokomeho. 

Nekundi okwa indile ngaaka esiku kwa li taku dhimbulukiwa esiku lyemanguluko kOkaku. Okwa li wo a indile aakalimo ya kale taya gandja epitikilo ngele taku pulwa oondjila tadhi piti momakoye nenge momapya gawo. 

“Ngele owa pulwa wu gandje epitikilo opo ondjila yi pite mepya lyoye, oshiwanawa ngele to gandja epitiklo ndyoka oshoka momukalo ngoka oto hwahwameke wo ehumokomeho,” ta ti ngaaka. 

Ta kumagidha kutya ehumokomeho ohali ya ngele elongelokumwe lyi li po, ihe ngele kali po kali na esiku lyi holoke. 

Ta indile aakalimo kutya naya kale wo ye na ekwatathano lya kola nepangelo ya vule okuya po nomatokolo omawanawa opo ku tothwe mo oondjila mpoka dhi na okweenda. 

“Tu yambidhidhathaneni okutotha mo oondjila kadhi li monkalo yi li nawa ndhoka dhu uka komahala gomayakulo ngaashi uukilinika, oosikola, oongeleka osho wo oombelewa dha simana opo ku tulwe oondjila dhi li nawa,” ta indile ngaaka. 

Ta ti ehumokomeho ohali kwata ethimbo shili, ashike olyi na okutulwa miilonga. 

“Otatu longo nuudhiginni opo tu tothe mo omayakulo ngoka ge na oshilonga, ga tulwe miilonga,” ta kwashilipaleke ngaaka. 

Nekundi okwa ti , epangelo ota li tsikile okulonga nuundhiginini okukwashilipaleka kutya oshigwana oshi na omauwanawa agehe tashi pumbwa ngaashi sha uvanekelwa. 

Ta gwedha po ta ti, elongelokumwe olyo hali etitha ehumokomeho, ta ti ihadhi gwanene omutse gumwe. 

-vkaapanda@nepc.com.na