Auleria Wakudumo
Omhangu yopombada oya kupulashi eindilo lokukufa po omufinda utilyana pokati koitukulwa yokoushimba naayo yokonooli yoshilongo, shaashi vati omutulimo weindilo Job Amupanda ina yandja ouyelele wa wana tau popile ekufepo lomufinda ou.
Omupanguli Shafimana Ueitele okwa ti omukondjifi womufinda utilyana ina yandja omatomheno a nghonopala kombinga yomufinda, ponhele okwa fekela omupanguli kutya okuna mo sha moshinima eshi.
Ueitele eshi okwe shi holola pefimbo ta yandje etokolo loshikumungu shomufinda utilyana momhangu yopombada onghela moWindhoek.
“Epangelo inali pumbwa elipopilo lasha kombinga yoshinima eshi shaashi Amupanda ina yandja omatomheno ongushu meindilo laye,” Ueitele ta ti.
Ueitele okwa ti ota twikile nokukalela po oshibofa shomufinda utilyana nonande Amupanda a ninga omafekelo kombinga yaye taa holola kutya otashi dulika a kale e na mo sha moshinima sha tya ngaha. Omupanguli okwa weda po ta ti omafekelo a ningwa kuAmupanda okwe mu etela ekuyunguto shaashi keshe etokolo ta ka ninga otali ka talika ko li li omhinge.
Amupanda okwa ninga omafekelo kutya omupanguli Ueitele iha futile eefalama daye mbali oishoshela yepangelo.
Nande ongaho, Ueitele okwa ti ina hala okunyamukula sha koshinima eshi ashike okwa ti oku na ofaalama i li kondje yomufinda utilyana ashike eshi Amupanda ine shi popya vati momafekelo aye.
Ueitele okwe lipopila ta ti ouministeli wounamapya owa pitika ovanafalama va konda 2 000 ovo va pitikwa okukala itava futu oishoshela kepangelo, onghene ke wete shi li mondjila ngeenge Amupanda okwe mu tofa mokati kavakwao va fa navo ihava mono ekwafo la faafana.
Amupanda okwa tulila mo yo omupanguli oshibofa ‘koLaw Society of Namibia’ opo vati a imbe omupanguli okuninga omatokolo kombinga yoshikumungu shomufinda utilyana.
“Okwa ningilange omafekelo kutya onda mona oshimaliwa sheengunga shi fike peemiliona N$5 okudja kehangano lopendjela ko-GIPF. Aishe ei omalundilo ashike taa ningwa,” Ueitele ta ti.
Ueitele okwa ti kutya Amupanda okwe mu lundila kutya mumwainamati okwa pewa edu kominista younamapya kwa li Carl Schlettwein.
Eshi ta yandja etokolo laye, Ueitele okwa holola ta ti momudo 2021, otuwa yaAmupanda oya li ya hadwa pOshivelo opo ku talike ngeenge omu na ombelela ngaashi hashi ningilwa oyeendifo aishe.
“Motuwa yaAmupanda omwa hangika ombelela oyo ya kwatwa ko ndele tai xwikwa po. Eshi inashi puka novanambelewa ava ve shi ninga inava teya oveta yasha,” Ueitele ta ti.