ONHUNO – Omupolifi Sergeant Dimbulukeveni Namhila weedula 43 ou a vati a dipaa omushingi wololi natango oku li modolongo konima eshi oshibofa shaye sha undulilwa komafiku 13 Auguste 2025. 

Omukulunhu koshikondo shokukonakona oimbuluma omupedukomufala Melanie Mburu okwa koleka ta ti Namhila okwa holoka komhangu lwoshikando oshititatu oshivike sha dja ko, ashike okwa anyenwa omhito yokulifutila mo modolongo. 

Okwa ti omakonakono kombinga yoshibofa eshi otaa twikile opo ku talike ngeenge ota dulu okupewa omhito yokulifutila mo modolongo. 

Namhila okwa kalelwa po kuhahende waye wopaumwene. 

Omwedi wa dja ko ovakwapata vaHamukwa okwa li va ngudumana momwaalu muhapu komhangu yamengestalata yaHangwena va ninga omunyano wopambili tava pula opo Namhila aha pewe omhito yokulifutila mo modolongo. 

Ovakwapata ova pula epangelo opo omakonakono a ningwe pauyuuki pehe na ouyelele tau holekwa. 

Ova hokolola tava ti Hamukwa okwa dipawa ehe na eshi a ninga molwaashi okwa hangika e li ashike omutumba mololi. 

Ova ti kutya fiyo opapa inava lombwelwa etomenho kutya omolwashike Hamukwa a dipawa. 

Namhila vati okwa yasha Eliud Hamukwa (38) ou e li omushingi wololi. 

Oshiningwanima osha ningwa omwedi Mai keinda lopolifi kOnhuno moshitukulwa shaHangwena efimbo loufiku. 

Hamukwa okwa xulifila koshipundi shokomesho mololi konima eshi vati a umbwa eeholo lwoikando ya yooloka. 

Omupopiliko wopolifi omupedukomufala Kauna Shikwambi okwa koleka ta ti okudja omwedi Mai, ondjabi yaNamhila oya patwa manga. 

Shikwambi okwa ti okudja omafiku 12 Mai Namhila okwa kufwa moilonga pefimbo sha landula eshi a kwatwa po. 

-fhamalwa@nepc.com.na