Opolisi moshitopolwa shaShana oya manga po omulumentu gwomimvo 43, sho anuwa a yelutha oshitenda sha hongwa sha fa ondjembo yo-Avtomat Kalashnikova (AK)-47, u ukitha hoka taku ende olutu lwomukokoli Sam Nujoma. 

Omupevikuluntu gwopolisi moshitopolwa shaShana Frederick Ndjadila okwa ti oshiningwanima shoka osha holoka Etine sho olutu lwa Nujoma kwa li talu zi mokapale koondhila Toivo ya Toivo kOndangwa. 

Otaku hokololwa kutya omulumentu ngoka okwa li a thikama kooha dhopate pamwe nayakwawo omanga ya tala olutu lwaNujoma talu piti po, sho a yelutha oshitenda shoka u ukitha hoka ku uka olutu. 

“Oshitenda shoka osha hongwa ngaashi naana ondjembo yo-AK 47, nosha li sha tilitha oshigwana. Opolisi oya li ye shi mu kutha noku mu manga po ethimbo olyo tuu ndyoka,” ta ti ngaaka. 

Sho anuwa oshitenda shoka sha ka konakonwa nawa, okwa ndhindhilikwa kutya kashi shi ondjembo yoshili, ihe oshitenda ashike sha fa ondjembo yo-AK-47. 

Ndjadila okwa ti, opolisi okupitila miikundaneki ya yooloka oya kala nokukumagidha oshigwana ngele tashi tala olutu lwomukokolipresidente, shaa humbate iilwitho yasha, sho inashi kala shi li kohi yiikolitha. 

“Oshigwana nashi kale tashi simaneke omalandulathano ga tulwa po uuna pe na iituthi yontumba. Omalandulathano ihaga tulwa po owala ihe oge na sho taga ti,” ta kumagidha ngaaka. 

-vkaapanda@nepc.com.na