Omuprimaminista Elijah Ngurare okwa kumike oshigwana shi hulithe po omatyonayi komalungula kombinga yokakadhona dhingi Okanamibia Johanna Swartbooi, hoka taka kalelela po Namibia kethigathano lyokakadhona dhingi muuyuni koThailand.
Ethigathano lyokakadhona dhingi muyuuni olyi li ko nena.
Aanamibia yamwe oya kala nokushanga nayi kombinga yaSwartbooi komapandja gomalungula ga yooloka, shoka sha talika ko kutya onkalo ombwiinayi notayi shololitha.
“Ndika ethimbo lyokugandja omukumo kokadhona dhingi ketu, noku ka yambidhidha opo ka vule okuulika oshitalenti shako nondjungu, ka vule ka sindane ko ka ete oshishani kegumbo,” ta popi ngaaka.
Ta kumagidha oshigwana shi gandje omukumo nokuyambidhidha naashihe opo Swartbooi a mone wo omukumo ye a kale e na enyanyu nombili komwenyo.
Sha ikwatelela komushangwa gwa nyanyangindhwa koshifokundaneki shoThe Namibian, omukuluntu gwehangano lyokakadhona dhingi moNamibia, Umbi Karuaihe-Upi okwa ti, oye li metifa noohahende okulonga naamboka taya popi nayi nokutuka Swartbooi komalungula.
“Onkalo ndjoka kayi li nawa, onkene otu na okulonga naamboka taya nyola omityonayi kombinga yaSwartbooi.
Shika itatu shi tala ko ongoshinima oshishona nando oshoka otashi eta uutondwe osho wo uukwamuhoko,” omushangwa gwa leshwa ngaaka.
Karuaihe-Upi sho anuwa a yi moonkundathana naSwartbooi kombinga yaashoka tashi taambathanwa komalungula okwa ti pethimbo ndika oku na ashike nokuulika oshitalenti she opo a sindane.
Ta ti, Swartbooi okakadhona ke na omukumo noonkondo, noku na einekelomwene kutya ota sindana oshishani shoka shokakadhona dhingi muuyuni.
Minista gwomauyelele nomakwatathano gopaungomba Emma Theofelus okwa ningi esiku noshikonga miitopolwa yokonooli, ta kumagidha oshigwana shi hulithe po okutaambathana omityonayi nuukwamuhoko komalungula osho wo okulongitha omalungula momikalo inaadhi uka.
“Onkalo yuukwamuhoko otayi teya po oshilongo nuukumwe, kashi li mondjila okuulathana nayi omolwuukwamuhoko, oshoka omuntu, omuntu ashike. Kape na eyooloko kutya okwa zi komuhoko gunipo,” ta kumagidha ngaaka.
Theofelus okwa kumagidha oshigwana shi longithe omalungula momukalo omwaanawa ihe hakuhwahwameka onkalo ombwiinayi tayi teya po oshigwana.
-vkaapanda@nepc.com.na