Auleria Wakudumo
Ombelewa yOmuprima oya holola kutya oshitukulwa shaShikoto osho ashike sha li sha xupa ko kokupewa oikulya yoshikukuta momalweefo oo a pita.
Oitukulwa ikwao oya li ya pewa omakwafo oikulya a yooloka okudja koTurkey, Qatar, India osho yo komahangano opaumwene.
Eshi osha dja eshi ovakwashiwana va holola omadiladilo avo kombinga yoshikukuta sholwishi (oukutu wolwishi 27 000) sha yandjwa koshitukulwa shaShikoto.
Omukulunhuwiliki mombelewa yOmuprima I-Ben Nashandi okwa holola ta ti epangelo ola mona omakwafo mahapu okukwafela oshikukuta.
Omakwafo okwa ningwa pamukalo wopashimaliwa ile wopaipalwifa.
Oitukulwa aishe oya mona nale omakwafo oikulya noshitukulwa shaShikoto osho sha li sha xupa ko.
“Oitukulwa ikwao oya li ya pewa oipakete yomaxuli eexuxwa i li 6 424, eendooxa domakunde 5 960, osho yo oufila wepungu, ombelela, omaadi, olwishi, eendooxa deeshi, eeshi ditalala, eesopa doSoya, eeshi dikukutu naikwao,” Nashandi ta ti.
Nashandi okwa holola kutya omapopyo oukwamunghoko kutya oshitukulwa osha pewa olwishi molwOmupresidente Nangolo Mbumba oo a dja koshitukulwa kae fi oshili notaa pukifa oshiwana.
Nashandi okwa weda po ta ti epangelo otali twikile okukwashilipaleka kutya oikulya oya topolwa shi fike pamwe koitukulwa yoshilongo.
“Oshikoto osha li inashi pewa nale oikulya yoshikukuta okudja kondje yoshilongo,” Nashandi ta ti.
Otaku hokololwa ovakwashiwana va kala nokuninga omafekelo kutya olwishi laChina vati kali na ngushu.
Nashandi okwa nyamukula komapopyo oo ta ti oikulya yoshikukuta aishe okudja kondje yoshilongo ohai ningilwa omakonakono opo ku talike ngeenge oi na oukolele noyi li monghalo yokuliwa kovakwashiwana omanga inai pewa oshiwana.
Okwa ti halo lwotete Namibia ta mono ekwafo kepangelo laChina.
China okwa yandjele natango olwishi mo2016/17.
Olwishi eli ola li la yandjwa koitukulwa ine, Erongo, Khomas, Oshana, noHardap.