Charles Ndeumane
Ehangano lyuukumwe waEurope (EU) olya yambidhidha Namibia moshimaliwa shoomiliyona N$3.8 mekondjitho lyoshikukuta.
Omupilimaminista gwaNamibia Saara Kuugongelwa-Amadhila mEtitano lyoshiwike sha ziko okwa taamba ko oshimaliwa shoka opo shi yambidhidhe moku landa iikulya yoshikukuta nomayambidhidho galwe ngoka ga pumbiwa pethimbo ndika. Ehangano lyuukumwe waEurope olya gandja omayambidhidho ngoka oku pitila mehanga lyaNamibia lyomushigakano omutiligane.
Shi ikolelela kuuyelele wa pitithwa kombelewa yomupilimaminista omayambidhidho ngoka ota ga ka topolelwa mbala aantu ye vule poomiliyona N$1.4 mboka ye li aakalimo yomiitopolwa yaKavango East, Kavango West, Zambezi, Omusati, Hardap, oshowo oshitopolwa shaMaheke oshoka iitopolwa mbyoka oyandhidhilikwa kutya oyo ya dhengwa unene koshikukuta noya pumbwa omakwatho gopaulumompumbwe. Anuwa omayambidhidho oga kwatela mo iikulya, omeya ga yela, oshowo oshimaliwa koomuma.
Pethimbo a popi poshituthi shetaambe ko lyomayambidhidho ngoka omupilima okwa pandula ehangano lyuukumwe waEurope molwa eyamukulo lya lyo lyomeendelelo, ta ti shoka ota shi dhenge omuthindo kelongelo kumwe pokati kaNamibia nehangano ndyoka moku kwathela aantu mboka ya ninga iihakanwa yiiponga yopaushitwe.
Oku za nkene omupresidente gwaNamibia Nangolo Mbumba a tokolele oshikukuta onga oshiponga shopaulumompumbwe Namibia onkene ta tsikile noku mona omayambidhidho giikulya oshowo iimaliwa oku za kiilongo oyindji muuyuni. Oshiwike sha ziko oshilongo shaQatar osha yambidhidha Namibia niipakete yiikulya yi li 50,000. Shika oshikando oshitiyali Qatar ta yambidhidha Namibia nuumvo.