Auleria Wakudumo
Ovaneumbo vamwe vomomukunda Oshitoo moTsandi moshitukulwa shaMusati ova fiwa pomutenya koshilulu osho sha xwika eenduda adishe 12 meumbo, moule womafiku anhe.
Mwene weumbo olo, Erastus Nekwaya okwa holola ta ti onghundana yonduda yotete ei yapya eye mu hanga koukamba Omaandaxa po23h00. Onduda vati oya tameka okupya manga ashike omukulukadi nounona veli poku kanangala.
“MEtivali lwopo 15h00, natango onduda itivali oya yaka omundilo. Hatu pondola ngaho okudima natango omundilo utivali,” Nekwaya ta ti. Nekwaya okwa ti eshi ngaho vati va mana okudima onduda itivali, yoo onhinatu otai tameke okupya. Ovashiinda navo vati ova hovela okufika opo va kwafele.
“Manga hatu dimi, onduda itinhe nayo oya yaka nokuli omundilo. Hatu li topola nee novashiinda opo keshe onduda i kale ina ovanhu tava dimi,” Nekwaya ta twikile.
Vati eshi ngaho ngeno va pondola okudima eenduda mbali odo dali tadi pi oshita, yoo imwe ili vati kokule naado dapya oya yaka natango omundilo.
Nekwaya vati eshi a mona eenduda nhano da pya ngomashendjo, okwa lombwela ovashiinda shaye vemu kwafele opo va tumbile eenduda deehoni da shaala mo mepya. Efiku olo tuu olo konguloshi lwopo 20h00 nopo 21h00 lwaapo, onduda imwe yomwaadi da tumbilwa mepya oya hovela okupya. Ngaashi shito, ova dima onduda oyo.
Oshipeleki shimwe nasho osha pya po mEtivali omo tuu omo. Etitatu lwopo 13h00 moshanga shomutenya, omundilo natango vati owa tameka. Omundilo owa xwika po yoo ongulu oshoyo oshipeleki shitivali shokupungulila. “Moshipeleki omwali oinima ihapu. Omwa pila oipundi o40 noinima aishe yocateringa kwali hatu longifa mongeshefa yetu. Omwa pila eesamende, oikulya yeengobe naikwao ihapu,” Nekwaya ta ti. Shikumwifi osheshi nee onduda oyo ya pyapo tete mOmaandaxa vati oya ka tameka vali okupya mEtinhe.
Nekwaya okwa weda po ta ti shaashi eenduda otadi pi ashike ngomashendjo, ova tutila oinima oyo va kufa meenduda dimwe naayo ili mudikwao inadi pya mepya.
“Manga hatu kufa mo oinima, eembapila dimwe twa ufila pedu mongulu nado oda hovela okupya nokuli. Eshi tuli mepya, hatu fuda po ngaho nee keloloko, oshipeleki shomumwange wokakadona nasho osha yaka nokuli omundilo,” Nekwaya ta ti. Paife ohava nangala ngaho nee vati mepya va kalela oinima yavo shaashi ova tila okuishuna mo meumbo pamwe tai pipo. “Oikulya aishe oya pila mo, oikutu ya pya ku mana, eumbo lange ola pya eenduda 12 – eenduda deehoni hetatu, oipeleki 3 nongulu imwe,” Nekwaya ta holola.
Councillor woshikandjohololo shaTsandi Junias Amukete okwa holola ta ti naye okwali a fika keumbo laNekwaya aka tale oshiningwanima otashi kumwifa.
“Ombelewa yange oya yandja ekwafo lopakafimbo loikulya kovakwanedimo ava, ashike natango otwa ninga eindilo opo tu mone eetenda dokunangala oshoyo okutula oinima yavo ya xupa po,” Amukete ta ti.
Amukete okwa weda po ta ti eshi ove na okushi ninga meendelelo shaashi paife efimbo lodula notai dulu okuponhoka ko efimbo keshe.
Ovaleli vopamhepo
Bishop wOngeleka yoReformed Evangelical Anglican Church of Namibia (Reach), Lukas Kaluwapa Katenda okwa holola ta ti oinima imwe ohai kala yopamhepo ya pumbwa ovaleli vopamhepo naimwe ohai kala ya pumbwa osho hashi ifanwa oservice of exorcism.
“Oinima yopamhepo, ovafita vahapu meengeleka kave na owino yokulwifa. Hano kave na shi oku taataa eemhepo odo. Sho osho u wete ovafita ihava kwafele vanhu moinima ei shaashi ka vena owino muyo,” Katenda ta ti.
Katenda okwa weda po ta ti eengeleka dimwe ohadi endelele okuhakula ovanhu ookutaataa endeemoni.
Endeemoni oko dili shili, ashike ovafita vetu vahapu kave shi nghene vena okuninga ngeenge tashiya poshikumhungu eshi. Osho u wete ovanhu vahapu tava fiye po eengeleka detu shaashi otavai apa pena ekwafo.
Omufitaongalo wongeleka yoEvangelical Baptism Church in Namibia Laban Mwashekele okwa fatulula kutya oinima yatya ngaho ohai li kolelele komufita ngeenge okuna ngaho owino wokushininga.
Mwashekele okwa kughilila ovanhu opo veli dilulule manga inava tondoka okukonga omakwafo penya naapenya.
“Oinima ihapu ihai tu hange shaashi tuna ekwatafano noinima younyuni. Okutambula Kristus otashi ti eemhepo adishe otadi ku yi onhapo,” Mwashekele ta ti.