Kakukutu komatanga opolifi Inspector General Joseph Shikongo okwa kumaida ovashingi veetuwa opo ve liufe komilandu da tulwa po kopolifi pefimbo lolutu lOmukokolipresidente Sam Nujoma ta li ka shingwa okudja kokapale keedila kOndangwa fiyo okEtunda. 

Shikongo okwa ti opolifi otai ka findikila omudimba okudja kOndangwa fiyo okeumbo lavo kEtunda moshitukulwa shaMusati. 

Okwa teelelwa omudimba u kale wa dja ko nodila koWindhoek nena efimbo longula. 

Olutu laNujoma otali twalwa koitukulwa ya yooloka omo taku ka ningwa oivilodimbuluko. 

Mongula otali twalwa kEenhana koshitukulwa shaHangwena nokudja opo otali twalwa koRundu fiyo Katima Mulilo. Shikongo okwa popya ta ti opolifi oye lilongekida okutula po elandulafano lomeendjila koitukulwa aishe tai ka ningilwa oivilodimbuluko yaNujoma. 

“Ovanhu ova pumbwa okufimaneka olutu lOmukokolipresidente pefimbo tali ende kopate,” ta ti. 

Okwa yelifa ta ti opate otai ka kala i hadi nena nosho yo mongula kOhangwena pefimbo olutu laNujoma talu ka shingwa. 

“Ngeenge omushingi wotuwa ta lombwelwa kopolifi kutya na yandje omhito kovaenda va pite po nena okwa teelelwa a kale e liufa komilandu,” ta ti. 

Okwa weda po ta ti ina hala okulopotelwa omushingi wotuwa e lipuma mumwe nopolifi molwaashi ina hala okulombwelwa kopolifi. 

Shikongo okwa pula oshiwana opo shi holoke momwaalu muhapu oku ka yandja efimaneko lavo kuNujoma. 

Okwa popya ta ti oimbuluma oya shuna pedu pefimbo Ovanamibia tava lili Nujoma. 

“Koshilandopangelo opolifi oye lipyakidila alushe okutula po elandufano neameno loshiwana,” ta ti. 

Okwa ti Omukokolipresidente okwa li e hole oukumwe, onghee osha fimana opo oshiwana shi kale shi na oukumwe nelongelokumwe pefimbo leefyo daye. 

-fhamalwa@nepc.com.na