Auleria Wakudumo
Oshiwana okudja koitukulwa ya yooloka yoshilongo osha tumbaleka omukokolipresidente Sam Nujoma ongomuleli nomukwatelikumwe woshiwana.
Loide Isak omukalimo wOmomadiva mOmuthiya okwa ti otava tumbaleke Nujoma shaashi okwa li e kwetele oshilongo kumwe nokwa mangulula oshilongo.
“Ohatu lili shili twa dengwa pedu konghundana yefyo latatekulu. Omukokolipresidente okwa li a kala ko ngaashi eehamba hadi kufwa ko ashike kefyo. Isak okwa weda po ta ti ovakwashiwana ova dja kokudengwa keembulu fiyo va mona efindano. Okwe ya mokati ketu ndele hatu udu kutya otwa manguluka shili,” Isak ta ti.
Ta ti Nujoma eshi a li presidente kakwa li kuna ou ha xupu ko koilonga. Ka li ha tale unene kodjapo ndele okeenghono domunhu.
“Ame ohandi mu fimaneke nokumutumbaleka unene shaashi onda mona eshi kwa li handi longo molutenda hatu umbu oixupulo, okwa kufa po ovamati va hanga 40 pokafimbo ashike oko shaashi hava longo noudiinini,” Isak ta ti.
Lahia Ekandjo weedula 80, omukalimo womEembaxu moshitukulwa shaHangwena okwa hokolola omukokolipresidente ongomunhu wovanhu, ha yolo nakeshe umwe.
“Nujoma okwa li e na omayoo e li kombada alushe, ha yolifa ovanhu vaye. Itatu pu okulila Sam, otwa dengwa pedu kefyo laye,” Ekandjo ta ti.
Hilde Sheehama weedula 60 momukalimo womomukunda Ohakweenyanga moshitukulwa shaShana naye okwa hokolola Nujoma ongomukwatelikumwe woshiwana.
Sheehama okwa ti otava kwena Okapembe kavo shaashi oka longa oilonga i shi kupandulwa.
“Pefimbo lomukokolipresidente a li kombada, onda li ndimushona shili ashike onghundana yoilonga yaye okudja kombada fiyo omoshilongo oye tu fika,” Sheehama ta ti.
Sheehama okwa ti ota dimbuluka oidano va dana eshi vashona tai tange tatekulu Nujoma osho yo omaimbilo va imba poudano hau kala vati komakango nokeenghandeka tava tange Nujoma.
Okwa weda po kutya ovanhu vahapu ava va li kombada naava va li va shaala moshilongo, naye a kwatelwa mo ova lukila omukokolipresidente Nujoma.
“Ngeenge owa pula keshe ou a lukila omukokolipresidente e shivike ile ehe shivike, oto dulu kumona omwaalu wa wana okuninga omukunda.
Nujoma okwa li ependafule letu,” Sheehama ta ti.
-wakudumoauleria@gmail.com