Nepando Amupanda ngoka a longa ongomugameni gwOmukokolipresidente Sam Nujoma uule woomvula dhi vulithe po20, okwa ti Aanamibia oya ndopa okutsitha ondjodhi yomukokolipresidente ndjoka yokumangulula oshilongo paliko.
Moonkundathana noshikundaneki shika, Amupanda okwa ti omukokoli okwa li e na ondjodhi okumangulula Namibia muukoloni, osho wo paliko.
“Oshilongo osha za mo shili muupika, ashike ngele otashi ya kemanguluko lyopaliko – otwa ndopa thiluthilu – otwa pumbwa okuya koNamcol,” Amupanda ta ti.
Amupanda ngoka a kala mosheendo shaagameni yaNujoma pokati ko1982 sigo omo 1990, nokukala ponto ye okuza mo1990 sigo omo 2005 sho Nujoma a zi ko koshipundi ota ti, andola oondjodhi nomalalakano ngoka Nujoma a li e nine Namibia oga landulilwe, andola nena moshilongo muka kamu na omuntu kee na iilonga – andola otatu ka ithana iilongo yopuushiinda ye ye yi tu kwathele.
Amupanda ta ti aagundjuka oyo unene taya dhana onkandangala mokukengelela ondjodhi yaNujoma, osho wo ombinzi yAanamibia oyendji mboka ya kanithile oomwenyo dhawo mekondjelomanguluko.
“Aagundjuka oya ninga omashenge, oshinima shoka sha li shi tondike kuComrade Presidente. Nujoma ka li e hole omashenge, kutya nee ogaakiintu nenge gaalumentu. Ihe ngashingeyi ogo ga tulwa melelo lyoshilongo. Onda pandula omupesidente [Nangolo] Mbumba sho a lundulua ompango opo oshinima shoka shuushenge kaashi kale moNamibia.
“Oshinima oshikwao, Aagundjuka otaya tambula oombumbo, dho odho tadhi ya manga,” Aupanda ta ti.
Amupanda ta ti oombumbo oshinima sha nika oshiponga noonkondo oshoka omuntu ngele okwa taamba ombumbo, nena okwi imanga komulungu. Ita vulu okupopya sha. Ita vulu okumakuka nande a mone pokuma pu na epuko, ota ontamene owala.
Ta ti omolwomapuko ngoka ga ningwa, Aanamibia oya pumbwa okutalulula onkalo, e taya landula omilandu ndhoka dha li dha tulwa po kuNujoma, opo owala oshilongo tashi ukilile.
“Andola moNamibia omwa li mu na aantu ye li owala nande 10, ye na uukwatya waNujoma, andola Namibia otali koko tali endelele. Oshima shoka shoomina dhi li momake gwaakwiilongo, tu na mo owala oopelesenda 10, hasho sha li ondjodhi yatatekulu Nujoma ndjoka. Okwa li a hala iinima ya topolwa 50/50. Paife niikwamina tayi longwa moshilongo otayi tutwa mo owala manga aantu ye li moluhepo.
“Oshilongo otashi li oongunga. Ngele owa tala pethimbo sho a li koshipundi, epangelo lyetu kalya li lyi na oongunga, Nujoma okwa li a hala Namibia lya yela kaali na oongunga. Ku na esiku u manguluke u na oongunga, osha faathana owala nokutaamba oombumbo – ku na esiku u maguluke paliko,” Amupanda ta ti.
-hshaanika@nepc.com.na