Kakukutu kopolifi Inspector General Joseph Shikongo okwa pandula oshiwana mwa kwatelwa ovashingi veetuwa molwashi she li umbata nawa pefimbo loivilodimbuluko yOmukokolipresidente Sam Nujoma mOnooli.   

“Ina palopotwa eetuwa de li denga mumwe ile ovanhu tava valu,” ta ti.

Edi Shikongo okwe di popya pefimbo loshivilo dimbuluko sha li kEenhana oshivike sha djako. 

Shikongo okwa ti okudja eike efiku omudimba wa fika kokapale keedila Andimba Toivo ya Toivo kOndangwa ovanhu okwa li tava ulike efano liwa okuyandja efimaneko kuNujoma.

Etine olutu lOmukokolipresidente Nujoma ola twalwa keumbo lovakulunhu vaye kEtunda moshitukulwa shaMusati oko kwa li oshiwana sha holoka momwaalu muhapu.

Etitano olutu ola twalwa kEenhana koshitukulwa shaHangwena oko nako kwaka ningilwa oshivilo dimbuluko oshitivali shomonooli.

Olomakaya efimbo longula olutu ola twalwa vali kokapale keedila Andimba Toivo ya Toivo noku twalwa koRundu oko kwa ka ningilwa oshivilodimbuluko shititatu, noshitine okoKatima Mulilo oko sha ningwa mOsoondaxa.

Shikongo okwa ti okudja efiku kwa shivifwa onghundana yefyo laNujoma, oimbuluma oya shuna pedu unene moshilandopangelo.

“Ovanhu otava holoka momwaalu muhapu koivilodimbuluko okuyandja efimaneko lavo kuxe yoshiwana,” Shikongo ta ti.

Okwa weda po yo kutya opolifi otai twikile okukaleka po eameno nelandulafano koshilandopangelo noshoyo koitukulwa ta kuningwa oivilodimbuluko.

Shikongo okwa pandula ovanambelewa vopolifi molwoilonga iwa tava longo pefimbo leefya daNujoma.

Oshivilodimbuluko nena otashi ningwa kodoolopa yaGroofontein omanga mongula oshi li koWalvis Bay.

Nujoma ota fudikwa mefiku 1 Marisa komaendo omapendafule Heroes  Acre koWindhoek. 

-fhamalwa@nepc.com.na