Onḓikameno mombwiko moumbomi wayo nomekuriro wayo, omasembamisiro wozonganda zomipepo nomapimbasaneno na wina ozonganda zomipepo nḓu maze ungura nourizemburuka oupe wapeke motjitamba tjovayenda. Imbi ooviṋa Oswapo ya Namibia mu mai yanisa okuyandja ko ombango yayo aihe tji ya kotoka komananeno wohoromende kombunda yomatoororero omueze mbu mau yende. Tjarwe Otutumbo nOvikunwa Nomeva oyo mu mai zeri okusembamisa onguzikiro ndji mai vatere ovaṱuta vondondo onḓiṱi mombandjarero yondanaukiro womuinyo nombepo yevaverwa. Mai yanisa okukuizika ombura aihe omangete 500 okutunduuza omaunguriro woviungurwa vyotjongo tjokombanda okurwisa ondjara; ourumbu nokutja pe kare ondjeverero yovikurya.  

Mombii tjingeyo mai yandja oruvara komasembamisiro wotuveze twomekurisiro wovinamuinyo nomatunduuziro woutomeno okuyandja omasa komaweziro wonḓengu woviungurwa nomasembamisiro wovitamba ovipe vyomarandisiro ovyo mbi hepwa tjinene i yovaṱuta momahi wokozombanda mbu ma ve yenda yenda. Mai hakahanisa omayandjero womeva kozombanda nokusesura, okuneneparisa nokututumuna ozondama; okutopora ozondjombo kutja onguzikiro yomeva i kare po kutja okovandu poo okovinamuinyo.  

Okutara komatjindiro wozomburo zombutiro nokutja ze pangiṋe ovakwatera vazo kangamwa pu ze ri poo pu maze hupurwa nokusesurwa, “Matu yanisa kutja irire ouatjiri Onamibia riparukire momuano woundondi ousemba momahupuriro wozomburo zaro zombutiro nokunana ovapwike osemba vouye wopendje; okuyerurura orupa rwaimba vomomehi; okunyomona omapwikiro  motjitamba tjozomburo zombutiro, na wina okumema , okuyakura nokutwa momaunguriro onguramemo noveta ndji notjiṋa nokutja ovakwatera va sere okukara norupa poo oundondi mozomburo zehi ravo. 

Tjingetjo tji kweya komaze womomatemba nongasa yo pu mai tja tjimanga mai twa po oveta ombame nombaranga yokutja ongahukiro kutja Ovanamibiana ve rire oveni vouini nu ve kare norupa.

Ohunga nomahundju tjo tji koro okoo kutja mai tjiti kutja pe kare oundondi womahundju mbu mau tungu otukondwa.