Abraham Mwanyekange

Kansela woshikandjohoololo Ongenga Joseph Neghwanya okwa talela po ofikola yopedu yaShingunguma mEtitano loshivike sha dja ko.

Ofikola yaShingunguma odula ya dja ko okwa li ya pata nokutuma ovanafikola komaumbo eemwedi da fika punhee omolwonghalo yefundja. Nenghwanya okwa ti omupresidente woshilongo Netumbo Nandi-Ndaitwah okwa yandja elombwelo odula ya dja ko opo eefikola odo da kumwa komeva efundja diha patwe neudo, nokwa li a yandja elombwelo kominista yoilonga noyeendifo opo i kale ya mona kutya opwa longwa sha shomupondo shi kaleke ovanafikola tava nongekwa no pefimbo lodula. 

“Okw ali nda pewa oshinakuwanifa odula ya dja ko opo ndi yandje omafaneko opokafimbo shi na sha nofikola eyi, naasho onde shi ninga nale, otwa teelela ashike omanyamukulo kepangelo,” Nenghwanya tati. Kundana okwa mona omukanda womafaneko e na sha nofikola yaShingunguma, oo wa tofa mo kutya ovanafikola nava tulwe momuhandjo wopokafimbo, ko naku tungwe oundjuwo vanhe. “Ovanafikola natango otava tauluka omeva nande kaale,” Grace Musheko ou e li omukulunhufikola ta ti.” Musheko okwa weda ko ta ti ovanafikola ove li monghuwo i na onghambe molwaashi kave shi efiku efundja tali ponoka ko. “Odula ya dja ko omulongi umwe okwe litembulifa po pofikola vo navakwao onghee tava twikile okukonga eefikola dimwe oko tava dulu okutembukila,” Musheko ta ti. Musheko okwa ti nonande ke shi oshietifi shovalongi tava kongo omatembu, otashi shiiva onghalo yomeva nayo yimwe yomoyeetifi. 

Omukulunhu welongo mOhangwena Isack Hamatwi okwa ti kape na manga omalongekido okutula ovanafikola vaShingunguma momuhandjo osho yo okutula po oundjuwo noke shi kutya otashi kaningwa naini. “Evatelo li li po paife shapo okutula po okanhopa kopokafimbo oko hatu dulu oku ka mona okupitila mOmbelewa yOmuprima. Omunashipundi woshitopolwa shOhangwena Lebeus Efraim Shipindo okwa lombwela Kundana kutya okupitila mombelewa yangoloneya ova kala omutumba nouministili woyeendifo noilonga, oRoad Authority osho yo o Road Fund opo va yandje omafaneko omeendelelo opo ofikola i mone omavatelo. “Shingunguma otwe mu tula mondodo yotete. Ouministili nomahangano oo avali owa ti ota u tu pe omayamukulo moule wefimbo lixupi.” 

–Shipindo. abbenghilai@gmail.com