Omaumbo e li anhe momukunda Okahameyona moshitukulwa shaHangwena, okwa fiwa pomutenya konima eshi omapya avo a hanaunwa po kodula yeemhawe.

Odula yeemhawe oyo ya lokele oshivike sha dja ko oya fiya ya fudula po omapya oo a li e na oilya ya mena noya kula, yo vati tai teyaula oilya ihapu oyo ya hangika ya kola nale.

Umwe womwaava ve na omapya a monifwa oixuna keemhawe Kaarina Kashikola okwa ti ye nghee a dalelwe a mone odula yoludi olo.

“Ngaashi ngaha otwa fyaala pomutenya neenghono shaashi moilya omo, ashike kwa li hatu xupu shaashi ame nghi na apa handi longo,” ta ti.

Okwa twikila kutya voo meumbo lavo ovelimo ve li va heyali, ndele ou elimo hanyangadala oyou halongo oilonga yokuwapaleka, naye mwene nee ou vati ha kwata oimaliwa yopeendjela youlema wokaoko kaye. 

Hilde Ndeutapo oo naye e li mongudu yaava ve na omapya a mona oixuna koshikungulu okwa ti ye meumbo lavo ove li mo ve li vahatetatu, no kape na nande oumwe ha nyangadala ehe shi omushamane waye ou ha kakwata ashike opeendjela.

“Oshili ohatu pula ekwafo kepangelo li tu yambidide momikalo omu tali dulu, opo tu dule okuxupa shaashi katu shi ngeenge oilya yetu otai nyumuka ngaho,” ta ti.

Omunashipundi welelo loshitukulwa shaHangwena Efraim Shipindo okwa ti, ombelewa yakansela oya yeulukila okukwafa keshe ovo va hangika koiningwanima yombaadilila ngashi ei. “Ashike ngeenge otwa nyengwa, oupyakadi ohau ukifwa keembonge da kula dombelelwa yOmuprima,” ta ti.

-taimihaihambo2000@gmail.com