Omahongero nOtutumbo nOvikunwa iyevari yomapu mu mwa tarerwe motjihungiriro tjotjimariva otjo wina ouṋepo oupe mondjuwo indji potjikando otjitenga pu wa yetere omaraka wawo Oritjatatu.

Movahungire ovatenga mwari, Bertha Ngifikwa wOindependent Patriots for Change (OIPC) na Marta Itope wOswapo. Omutjuṋikwa Nghifikwa, ngwari Omiṱiri ape oure wozombura o-15 ngunda e hi ye ya kondjuwo ndji, wa raisire kutja otjomundu ngwa zu kotjitamba tjomahongero kanaa zembi ku ma zu tjinga okuhina okuyaruka ku wa zu ayeri okukapwa ku wa i. Mu nao ngamba eye otji ma zemburuka ondjuriro yOzomiṱiri ozongwao eye wina ndjari ondjuriro ye. 

Na zemburukisa ondjuwo indji ounahepero wokutja omahongero yerire omanavihape mokutja imba mba pitire muwo va sere okukamuna oviungura nave ha karira owomorupanda tjimuna omitanda omingi mOnamibia ndino ndi. Ouhepe woviungura mokati komitanda otja kovivarero vyokotjiveta vyohoromende ozoperesende o-46.1 otja kovivarero vyo 2023.

Otja ku Nghifikwa omena rokutja omahongero mOnamibia kaye tjama noviungura. Pu mape hee kutja ovahongwa ve muna ozombapira zomotjiuru uriri nḓeri zokutjita poo okumema oviṋa. Tjimuna nandarire omahongero wOtutumbo nOvikunwa mozosikore nge he ri pondondo yokuryamisa ovahongwa komurungu tjinga otjirihongwa tji atji he ri tjimwe tjovirihongwa mbi varwa otjotjinahepero komuhongwa okutuurunga tjimuna ovirihongwa vyarwe mu mu nOtjiingirisa. 

Wina Nghifikwa ma tja omahongero womekurisiro rukuru wovanatje komahongero ohepero wina tjinga otutu twotjiwaṋa otjini aeri ohepero tjinga omuatje mokukura kwe aturi oviṋa vyopopezu na ye novitenga eye me yenena okurihongera nu wina mbiri otjihorera kuye. Korusenina ma raisa kutja otjimariva otjingi morupa romahongero tji yenda kokusuta ovaungure vorupa indo ngunda ovahongwa ave hongerwa moupereke.