Omupedu kakukutu kopolifi Elia Mutota okwa ti opolifi otai kwashipaleke kutya oufemba wovakainhu owa fimanekwa notava kala veli meameno voo vali itava tongolwa. 

Edi Mutota okwe di popya oshivike sha dja ko pedimbuluko letyapulo lefiku lovakainhu mounyuni olo la li kOpuwo moshitukulwa shaKunene. 

Efiku ola dimbulukiwa koshi yoshipalanyole “Oufemba noufike pamwe wovakainhu noukadona.” 

Ovakainhu, ovaleli veendodo da yooloka noshoyo minista woukashike kookanhu okwa li va ngudumana okudimbuluka efiku lovakainhu mounyuni. 

Mutota okwa ti ovakainhu noukadona nava fimanekwe moshiwana molwashi ova fimana molwoilonga iwa tava longo. 

Okwa ti opolifi otai twikile okukandeka omahepeko omomaumbo taa ningilwa ovakainhu noukadona. 

“Oshi li oshinakuwanifa shopolifi okuamena ounona novakainhu,” ta ti. 

Okwa yelifa ta ti koshikondo shopolifi oku na ovakainhu ve li pondodo da yooloka dopailonga ngaashi naana ovalumenhu. 

“Otu na ovakainhu va ninga ovakulunhu vopolifi koitukulwa ya yooloka. 

Oufike pamwe moilonga owa fimana molwashi eshi otashi tu ovakainhu omukumo,” ta ti. 

Okwa ti opolifi oi na opolongalama hai ungaunga nomahepeko oukashike kookanhu. 

Mutota okwa pula oshiwana, ovaleli vopamifyuululwakalo noshoyo ovaleli vepangelo opo va longele kumwe okukondjifa omahepeko oukashike kookanhu. 

fhamalwa@nepc.com.na