Auleria Wakudumo 

Outapi – Ovafuko ve li 134 ove lishangifa mOlufuko litimulongo naimwe, omuvalu oo wa talika ko muhapu okuyelekanifa needula adishe okudja nghene oshivilo sholufuko shatamekwa mOutapi 

“Omwaalu ou inau monika nale mOlufuko okudja nghene Olufuko la tameka momudo 2012. Oukadona ova holoka mOlufuko Osoondaxa novadali vavo,” Omupopiliko wodoolopa yOutapi Joolokeni Haidula ta ti. 

Olufuko ola hovela Etitano momafiku 20 Juni neudo mOutapi notali ka xula mu 01 Juli. 

Olufuko ota li twikile nokudimbuluka olweendonghalamwenyo yOmukokolipresidente Sam Nujoma. 

“Nonande ke mo vali mokati ketu, oitya yaye otai twikile okukwelengedja momatwi etu,” ta holola ngaho. 

Nujoma okwa li e hole okutya, “olufuko ola fimana okukwatela po ondjokonona yomufyuululwakalo mounona voukadona. Okwa ti olufuko ola fimana shaashi otali hongo omikalo, eitavelo neenghulunghedi doshilongo,”. 

Haidula okwa holola kutya Olufuko otali twikile okukwata ko ovanangeshefa vashona naava vakula, omahangano opaumwene osho yo epangelo. 

Neudo, olufuko oli na ovakufimbinga ovanangeshefa ve li 147, mwa kwatelwa omahangano opapangelo nomahangano opaumwene, novanangeshefa vashona naava vakula. 

“Olufuko ola mona ovalandifi voupana ve li 51, ovalandifi voihongomwa ve li 10, ovanangeshefa vashona ve li 36, ovalandifi vounamapya nounaimuna ve li 27, osho yo omahangano a yooloka e li 23,” Haidula ta ti. 

Umwe vomovandifi voikulya yOshiwambo, Helena Shuuveni okwa holola kutya ongeshefa otai ende nawa. 

Okwa ti oku na omukumo kutya oilandifomwa yaye otai pu po shaashi eekastoma oda ninga dihapu neudo shi dulife odula ya dja ko. 

“Eshi u wete ovanhu tava endele ko efiku lotete ngaho osha hala okutya out na eekastoma neudo,” Shuuveni ta ti. Ruusa Hamutenja oo ta landifa omalodu oilya okwa ti okuhole okulandifa omalodu shaashi oku na eekastoma dihapu. 

“Ovanhu ohava kala va djuulukwa omalodu shaashi vamwe ihava dungu komaumbo avo. Oshitoo shange shimwe osha pwa nale, nashikwao osho handi landifa ngaha. Ondi wete neudo tu li melao leekastoma shaashi ovalandifi novakufimbinga va ninga vahapu neudo,” Hamutenja ta ti. 

Hamutenja okwa ti oha kala e lilongekidila olufuko keshe odula opo a mone mo okafilinga ka kola. 

Okwa ti oha mono mo sha, sha kola molufuko shi dulife ponhele yaye opo ha landifile keshe efiku modoolopa yaOutapi. 

-wakudumoauleria@gmail.com