Auleria Wakudumo 

Okamati keedula 14 oka tulwa moipandeko eshi vati ka ya moukongo wounona voumati ve li pokati komido heyali nahetatu noku va kwata onghonga. 

Oshiningwanima eshi osha ningwa Omaandaxa efimbo inali shiivika momukunda Oshilemba moTsandi. 

Omukulunhu wopolifi moshitukulwa shaMusati, Commissioner Ismael Basson okwa koleka oshiningwanima eshi. Otaku hokololwa vati omufekelwa a hanga ounona tava kongolola eengobe mekango, ndele ta tameke oku va taataa, te va kwata kooumwe naaumwe, nokudula mo oikutu yavo keenghono ndele te va kwata keenghono. Opolifi oya holola kutya omufekelwa okwa hanga ounona voumati vanhe koulifilo. 

“Okwa kwata ounona vatatu kookamwe nookamwe ndele te va longele oushada eshi e va enda konima,” opolifi tai holola ngaho. Opolifi oya ti okaana okatine oka faduka po eshi ka mona osho sha ningilwa vakwao ndele taka ka lopota kovakulunhu keumbo ovo va shivifila opolifi. Otaku hokololwa kutya omufekelwa vati oku li xekulu yanakuningwa oshihakanwa umwe ashike ihava di meumbo limwe. 

Omufekelwa oku li omushiinda shoumati aveshe ovo a kwata keenghono. 

-wakudumoauleria@gmail.com