Epangelo ohali yandje omakwafo opashimaliwa kounona veefiye naava ve li moluhepo vomoshitukulwa shaShana ve li 33026.
Edi oda popiwa kungoloneya woshitukulwa shaShana Hofin Iipinge pefimbo kwa li ta yandje omushangwahokololo kombinga yonghalo yoshitukulwa shaye mEtitano.
Iipinge okwa ti epangelo, oku pitila mouminiteli woukashike kookanhu ota li endifa nawa opologalama oyo yokuyambidida ounona veli momhumbwe.
Okwa yelifa ta ti ounona tava yambididwa kepangelo eefiye oshoyo ounona voukwanaluhepo ovo va pumbwa omakwafo.
Okwa ti natango moshitukulwa shaye omu na omandiki ha yandje eetundi dopetameko kounona melongelokumwe nouministeli woukashike kookanhu.
Ngoloneya okwa ti epangelo ota li twikile okuandjaneka omakwafo kounona oshoyo okukwashilipaleka kutya ounona ova mona omhito yokuya kofikola.
“Ouministeli wokashike kookanhu nonghalo nawa yookana otau twikile okukwashilipaleka kutya ounona ava ova a menwa komahepeko omomaumbo,” ta ti.
Okwa ti ounona ova fimana molwashi otava ka ninga ovaleli vokomongula oshoyo ovanashilonga va yooloka.
Iipinge okwa kumaida ovadali opo va tonatele nawa ounona oshoyo okuvatuma kofikola.
Ovaleli vopapolitika veendodo da yooloka oshoyo ovanambelewawiliki okwa li va holoka momwaalu munene okupwilikina koshipopiwa shangoloneya.