Auleria Wakudumo

Elelo lodoolopa yOutapi ola tula moilonga oproyeka yokuandjaneka olusheno molukanda Extension 20, Phase 1. 

Omupopiliko welelo lodoolopa yOutapi Joolokeni Haidula okwa holola kutya elelo otali longifa oshimaliwa shi dule peemiliona N$2.9 okukwashilipaleka kutya ova andjaneka olusheno moExtension 20. 

“Oproyeka oya tameka nale muJuni neudo noya tengenekwa tai ka kala ya pwa muSepetemba 2025,” Haidula ta holola ngaho.  

Haidula okwa ti oproyeka ei oyo imwe yomexumokomesho tali ningwa kelelo lodoolopa yOutapi okuhanga omalalakano okomutandako ngaashi okuwanifa po omayakulo ongushu kovakwashiwana, okuyambula po onghalo yovakwashiwana momalukanda osho yo ikwao imwe ya wedwa po. 

Haidula okwa holola yo kutya ngeenge oproyeka ei ya pu, otai ka andjaneka olusheno komaumbo e li 55. 

“Omaumbo oo, eenhele 20 oda pewa nale oovene omanga eenhele 35 inadi mona oovene natango,” Haidula ta ti. 

Omupopiliko wodoolopa okwa holola yo kutya olukanda loExtension 20 mOutapi ola tulwa nale oipumbiwa yefiku keshe imwe ngaashi omeva osho yo oundjuwo. 

“Okutula ko olusheno otaku kala kwa xuuninwa okutwala komesho exumokomesho lomaumbo olo tali ka shikula ko meendelelo,” ta ti ngaho.  

Haidula okwa ti oproyeka ei otai tu kumwe netengeneko lakula laNamibia hali ifanwa Vision 2030. Okwa ti oproyeka otai tu yo kumwe nelalakano lOmupresidente Netumbo Nandi-Ndaitwah eshi a ti Ovanamibia ova pumbwa omayakulo ongushu oshilongo ashishe. 

“Oshilonga shetu okulongela ovakwashiwana, otwa ninga eudaneko olo tu na okukwashilipaleka kutya otwe a wanifa po,” Omupresidente osho a ti ngaho. 

Elelo lodoolopa otali indile ovakalimo vomOutapi opo va ninge omaindilo eenhele 35 edi da hupa ko opo ovatungi va hovele okutunga. 

Elelo lodoolopa yOutapi natango otali indile yo ovakalimo valo opo va twikile okufuta oishoshela yavo kelelo lodoolopa opo li twikile okuyandja omayakulo koshiwana nena nomonakudiwa.

-wakudumoauleria@gmail.com