Taimi Haihambo 

Minista woimaliwa nomaliko oshilongo Ericah Shafudah okwa ti ovakwashiwana vaAngola ava hava kala ve lihanena odoolopa yaShikango tava landifa kolupadi, otava ka pewa eembapila dokushingifa okudja omwedi ou. 

Shafudah eshi okwe shi popya pefimbo loshoongalele shoSwapo sha li kOndangwa Olomakaya, konima eshi ovanyasha ava va li va kufa ombinga va yandja omakemo avo nghee tava li tava pi keengeshafa dovaAngola. 

Ovakwashiwana vaAngola ava have ya okulandifa meni loshilongo ova didilikwa tava eta omakuyunguto moshiwana shaashi vati inava hala okulandula omilandu da tulwa po kelelodoolopa laHelao Nafidi. 

Ovanhu otava kakeke odoolopa, vo inava hala okulandifila komatala oku ku na ovalandifi vomangeshefelo opedu aveshe. 

“Oiningwanima yoludi eli oyo ya etifa epangelo li dule ko eenghaku, opo li tule omalandulafano peenhele opo ovashiindalongo ava va pewa omikanda dokushingifa, vo tava shikula omilandu dodoolopa,” Shafuda ta ti. 

Rauna Kondjeni oo naye e li omulandifi womangeshefelo opedu, okwa ti vo eengeshefa davo oda iwa moshipala keengeshefa dovaAngola. 

“Nande opolifi nai va taataye oshili, ova fa ashike eengongololo. Vo natango inava hala okulandifila oinima yavo komatala, shaashi inava hala okufendela omatala ngaashi ovanhu aveshe,” ta ti. 

Okwa twikila kutya Ovaangola vahapu otava landifa oilandifomwa ya fa yavo, vo tave i ningi ombilixa, paife eekastoma ohadi lotokele ashike apa pe na ombilixa vo tava kala inava landwa. 

Laimi Aron oo naye ha landifile kodoolopa yaShikango naye okwa ti okwa pandula ediladilo lokupa Ovaangola omikanda dokushingifila moNamibia. 

Oshikango odoolopa i li koshi yelelodoolopa laHelao Nafidi, noi li keengeba dAngola naNamibia. 

-taimihaihambo2000@gmail.com