Auleria Wakudumo
Eshi eefikola dihapu tadi ende nokupitifa omaindilo ovahongwa ovo va yuka mondodo onhihetatu nondodo yotete modula tai uya, ovadali vahapu ova hovela nale okukwata oxuxwa komulungu navamwe ova yunga onhanda peefikola opo va monene ovana onhele manga kuyela.
Nonande kwa nyika ofela paife, vahapu otave litetuka opo vaha ka kale ve na ounona tava elaaela eshi inava mona onhele pofikola opo va hala.
Keshe kodula, ovadali ohava mono oixuna mokukonga eefikola dounona unene ava va uka mondodo yotete osho yo ondodo onhihetatu.
Moshitukulwa shaMusati, ovadali vahapu ova nangala pomuvelo wofikola yaCanisianum Roman Catholic moshikandjo shaAnamulenge ve na etimaumbwile lokupewa eefooloma dovana vavo ovo va uka mondodo onhihetatu modula tai ya.
Ovadali ova shivifila ovanambelewa vouministeli womauyelele moshitukulwa shaMusati kutya nonande ku na outalala, ova nangala poshivelo shofikola opo vaha xupe ko keefooloma dounona shaashi ohadi yandjwa kwaau e ya tete.
Otaku hokololwa ovadali va konda 700 lwaapo.
Omukulunhufikola Henriette Ainima okwa holola kutya ofikola yavo ohai tambula ashike ovahongwa ve li 80 mondodo onhihetatu.
Ainima okwa holola yo kutya osha fimana okulongifa ouyuuki mokuhoolola ovahongwa vavo.
“Ava ve ya tete ove lishangifa omadina avo, osho tashi holola kutya ovo va fika tete ovo tava ka pewa eefooloma dokuyadekela ounona vavo,” Ainima ta ti.
Ainima okwa ti shito ohava yandje eefooloma keefikola da yooloka opo ovadali tava dulu okufika noupu, ashike molwomaimbo onhumba nongadi, inava dula oku shi ninga neudo.
Melania Nghilukilwa, omukalimo womOngwediva okwa holola kutya okwa fya ounye oku ka tambulifa omumwaye kosekundefikola yaCanisianum Roman Catholic mokuuda kutya okwa li ovadali ve dule 700 efiku lotete ashike ofikola ohai tambula ashike ovahongwa 80.
“Okwa li ndi na etimaumbwile kutya omumwange ota ka fikola koCanisianum. Okwa li andi ti ngeno ohandi i ko mEtitano ashike paife ondi na okukonga ashike ofikola imwe,” Nghilukilwa ta ti.
Moshitukulwa shaShana, ovadali ova hovela yo okukonga eefooloma dounona vavo.
Eefikola da pitifa omaindilo ongaashi osekundefikola yaMweshipandeka, osekundefikola yaGabriel Taapopi nadikwao da wedwa po.
Moshitukulwa shErongo, ovadali omafele natango otava monika va kalela oivelo yeefikola tava kongo eefooloma domaindilo ovana ovo va uka mondodo yonola osho yo ondodo yotete.
Otaku hokololwa kutya omaindilo ovahongwa vondodo yotete oo okwa xula Omaandaxa omanga ondodo yonola a xula Etivali.
Eefikola adishe modoolopa yaWalvis Bay odali dina eenhele di dule po 900 dovahongwa.