Auleria Wakudumo
Ominista yehongo, oungoba nomaudano Sanet Steenkamp oya holola kutya vamwe vomovahongi ovo vali vehe na oilonga ve fike po1 300 ova mona oilonga neudo.
Minista eshi okweshi holola pefimbo a li ta nyamukula komakemo ovahongi vehe na oilonga ovo vali va tula mo omunyanyo wopambili tava pula opo epangelo li va pe oilonga.
Steenkamp okwa dimina kutya epangelo ile ouministeli inau tula aishe oyo ya pumbiwa okutula peenhele opo va kandule po oudjuu wovahongi ovo vehena oilonga.
“Itatu dulu okukuta ovahongi vahapu poshikando shaashi fiyo opapa katuna omwaalu wofaafaa kutya ovahongi vangapi vehena oilonga ile kutya ovahongi ava oveli longela eendodo dilipi po oshoyo oilongwa yavo,” Minista ta holola.
Minista okwa yelifa kutya ouministeli owa pumbwa okukala wa shiiva kutya omwaalu wovahongi vangapi vehena oilonga, eendodo davo noilongwa yavo tete opo u twikile okuninga omalogekido a wedwa po.
Okwa ti ouministeli owa didilika kutya eendodo dopedu okudja pondodo yonola fiyo opondodo onhiheyali una ovahongi vahapu vehena oilonga.
Nonande omwaalu wavo uli nale pombada, natango vati ovalihongi vahapu onghene tava twikile okukufa eifano eli.
“Eendodo dopeduelela (ondodo 0-3) oshoyo eendodo dopedupombada (ondodo 4-7) odo di hadi ovahongi omanga eendodo dopombada da pumbwa natango ovahongi unene moilongwa imwe,” Steenkamp ta ti.
Steenkamp okwa ti ouminsteli wehongo owa longela kumwe nouministeli woshimaliwa opo u dule okuyandja oilonga kovahongi 1 300.
Minista okwa holola kutya ovahongi inava hala okutambula ko kutya okuyandja oilonga ovahongi vahapu poshikando itashi dulika.
Ovahongi vehena oilonga otava pula va tulwe meefikola op ova tameke oilonga shaashi vati oveli longela ouhongi eedula nhee. Minista okwa ti eshi itashi dulika shaashi ouministeli ohau landula omulandu wokuyandja oilonga ngaashi ashike eeministeli dikwao.
“Oktoba 2021, Omupangulidjai okwa li a holola kutya ovahongi itava dulu ashike okutulwa meefikola ngahenya va hovele oilonga inava landula omilandu adishe mwa kwatelwa okuninga eeinterview. Okwa ti ovanhu avena okushikula omulandu wokuyandja oilonga,” Steenkamp ta ti.
Minista okwa holola yo kutya itashi dulika okuyandja oilonga sheli kolelela kodula eyi omuhongi eli longela ngaashi ovahongi va pula.
Ovahongi ovali va holola kutya ova hala ovo va kala vehena oilonga oule wefimbo ovo va tamekwe okupewa oilonga tete.
Steenkamp okwa ti Namibia okuna oiputudilo yopombada yepangelo ivali oshoyo eecollege 60. Okwa ti eecollege dimwe inadi shikula omilandu douministeli osho hashi eta vanhu vamwe va kale inava mona oilonga konima yelihongo.
Omwedi wadja ko, ongudu yovahongi vehena oilonga oya tula mo omunyanyo wopambili tava pula opo epangelo li va pe oilonga.
Ongudu oyali ya pula ouminsteli u kufe po omapulapulo gee taku kutwa ovahongi, exwata loilonga, nehapupalo leengulu dofikola moshilongo.