Jazema Hangero 

Ovahongwa vonganda onene yomahongero indji Ounama kehi yotjimbumba tjOmbazu tjavo Otjiuaṋa Cultural Society mave hepa ozombatero okurirongerisa nazo kotjitjitwa tjeyuva rwombazu tji matji kara ko omueze mbu mau yende omayuva tji ye ri 06-09 Katjose 2025 pOunama. 

Omutjangerepo wotjimbumba Pekara Kaveru ma tja veri kamwaha kungamwa ombatero kokutja ve kawondje komurungu okuṱiza, okukurisa, okuhonga ombazu neraka rOvaherero, pamwe nokuyeta ovahongwa veraka rawo pamwe kokutja ave ha umwa, okupuka nokukongorera ozombazu nozongaro zomihoko vyarwe. 

“Tjiri, twa suvera ombazu yetu mo nao katu vanga okuitarera amai koka poo okungundipara pamwe nokupandjara omaheya nonḓengu. 

Tu zera kokutja ovanene vetu tji vazu nokuwomboroka ai he rivanda pehi kako, nungwari tu i kurise okuyenda komurungu.” Vezera otuhindo okukayandja omasa nokurongerisa ovahongwa veraka mberi kozosikore zokozombanda (ozoresevate) tjinene kotukondwa ku vaza: Omaheke, Otjozondjupa na Kunene.

Nokusembamisa ovitjitwa pOunama okuworonganise ovahongwa ovakwao noku ṋanga ovaheṋendu pekepeke motjiwaṋa veke ve honge nokuvezemburukisa ovirumatwa vyombazu yao pamwe nomeritjindiro wovanatje mokati kotjiwaṋa. Posi ya ozombatero novimariva ongendo nu vi yarura ozonḓero zetu ombunda tjazumba ku tu teya ombango.

Otjiuaṋa Cultural Society tja zikama rukuru mombura ndji 1992. Ombura ndja zuko (2024) tja taarere oruveze orutenga povitjitwa vyombazu, 2023 tja taara oruveze orutenga otjotjimbumba otjinamuinyo (most active society) ponganda yomahongero. Onḓero yatjo okutja tji yaruke noruveze orutenga rukwao ombura kotjitjitwa tji tji ri ko omueze mbu mau yende. Tji sane kOmurari FM mbu ku za: “ondenga pozongwao, oitjavari pu indji ndji he ri po.”