ONDANGWA – Omukulunhuwiliki wehongo koshitukulwa shaShikoto Aletta Eises okwa kumaida ovakulunhufikola keefikola da yooloka opo vaha ningile ovahongifikola okatongo.
Eises okwa li ta popi oshivike sha dja ko kOndangwa pefimbo lomadeulo a pewa ovakulunhufikola ve li 26 vape.
Ovakulunhufikola ova dja keefikola da yooloka domOshikoto, omo kwa li va mona omhito yokupula omapulo.
Okwa li tava pewa omadeulo ngaashi nghene oshimaliwa shi na okulongifwa pofikola, kombinga yomalihumbato, omilandu di na okulandulwa ngeenge ta pa kutwa omuhongifikola nosho tuu.
Eises okwa yelifa ta ti oshi li oshinakuwanifa shomukunhufikola opo a kwapashipaleke kutya pofikola yaye ope na ombili nelongelokumwe.
“Omukulunhufikola okwa pumbwa okuulika oshihopaenenwa shiwa pofikola molwaashi oye omutwe wofikola,” ta ti.
Okwa weda po ta ti neenge pofikola ope na oupyakadi nau kale tau kundafanwa ndele tau kandulwa po.
Okwa ti kape na omukulunhufikola a pitikwa okukala ta xwaxwameke ovahongifikola novanafikola va waimene ongudu yaye yopapolitika ngeenge e li kofikola.
Eises okwa ti omukulunhufikola na kwashipaleke kutya oimaliwa yofikola otai shangwa momambo kutya oya longifwa shike.
“Ngeenge ofikola oya pewa omaano oshimaliwa ile oikwafifohongo nai shangwe ndele ombelewa yomukulunhuwiliki tai shivifilwa,” ta ti.
Okwa ti ovakulunhufikola nava kale ve na oukumwe nomalelowiliki eefikola nosho yo okukala tava ningi oihongi.
“Ovakulunhufikola nava kale tava lalakanene oidjemo iwa yepito,” ta ti.