Auleria Wakudumo 

Nonande ope na oveta ipe ya tulwa po kouministeli woilonga kutya ovanailonga vomomaumbo nava futwe oN$12 movili, ovakulupe vahapu unene vokomikunda eshi itave shi dulu shaashi odjo yavo yoyuuyemo opendjela oyo hai di kepangelo. 

Omulandu mupe wa tulwa po kouministeli woilonga muJanuali 2025. Hano sha hala kutya ngeenge omunailonga oha longo eevili hetatu mefiku, nena oku na okufutwa N$2 880 komwedi, omanga opendjela yovakulupe N$1 600 komwedi. 

Omukulupe weedula 80 womomukunda Oshinyadhila okwa holola kutya oha tukula pokati opendjela yaye opo a fute omunailonga waye. 

Petrina Sheehama okwa holola ta ti ke na eshiivo ngeenge ope na oveta i na okushikulwa shi na sha neendjabi dovanailonga. 

Okwa weda po ta ti komikunda ohava kongo ashike ovanhu ovo tava dulu oku va kwafa shaashi paife ombuda itai dulu vali okupetuka. 

“Otwa tula po eudafano kutya ohandi kala handi futu N$800 komwedi. Oshimaliwa osho tashi popiwa kovanambelewa osha pitilila opendjela yange, kandi na apa handi shi kufa,” Sheehama ta ti. 

Omukulupe umwe okwa weda po ta ti ke na omukwafi meumbo, onghene oku na ashike okukonga omunailonga. 

“Ondi na ngaho okulanda okafila nokavelelwa komeumbo – nomunailonga omo ha li, ame handi ka futa ngaho omeva ange, ame vali ondi na oku ka tala eepela dange dohonde ya londa koshipangelo,” ta ti. 

Otaku hokololwa yo kutya ovanailonga vahapu hava longo momaumbo okomikunda Ovaangola. Vahapu ova holola kutya ovo ashike tava kalela oilonga nohava longo noudiinini, okuyelekanifa nOvanamibia ovo va hala ashike oilonga yokeedoolopa. Vali Ovaangola vati ohava kundafana novayandji voilonga ovo itava dulu ofuto i li pombada. 

Oule wefimbo, ouministeli owa indika yo okukuta Ovangola vehe na omikandapitikilo moNamibia. 

Ouministeli owa kunghilila ovo tave shi ningi natango unene komikunda opo ve shi xulife po.

Omulandu wa tulwa po owa holola yo kutya mo2026, ovanailonga vomomaumbo otava ka futwa N$15 movili nomo 2027 otava ka futwa N$18 movili. 

Omupopiliko wouministeli woilonga Elias Amunyela okwa holola ta ti elunduluko ola tameka muJanuali woneudo notali i fiyo omo 2027.  Amunyela okwa yelifa kutya ngeenge omuyandji woilonga okwe lihange ita dulu okufuta ofuto ya tulwa po kouministeli, nena oku na okuninga eindilo. 

“Ouministeli ohau yandje epitikilo komuyandji woilonga nopamhito ei ovakulupe ovo ovayandji voilonga nove na okushangela kuminista,” Amunyela ta ti. 

Amunyela okwa indila ovakulupe opo va ninge omaindilo kouministeli, tava holola kutya itava dulu okufuta ofuto ya tulwa po ndele tava pewa epitikilo. -wakudumoauleria@gmail.com