Auleria Wakudumo 

Ovakulupe ova holola eudonai lavo eshi opendjela itai ka wedelwa omudo ou. Ova holola kutya opendjela oya pumbwa okuwedwa ngaashi ashike oinima ikwao tai ende nokuwedelwa moshilongo. 

Omupopiliko wouministeli wemona Wilson Shikoto okwa koleka kutya opendjela itai wedelwa neudo. 

“Itandi dulu okukalela po kutya omolwashike opedjela itai wedelwa ashike momutengenekofaneko inamu popiwa opendjela tai wedelwa,” Shikoto ta ti. 

Hilde Shiyuka omukalimo womoWindhoek okwa holola ta ti okwa uda nai eshi inava wedelwa opendjela. 

“Inatu pumbwa okuwedelwa omayovi ile oshimaliwa shihapu, ashike otwa hala ngaho okuwedelwa nande oN$100 ile oN$200 shaashi otu na eemhumbwe dihapu,” Shiyuka ta ti. 

Shiyuka okwa ti ove udite ko kutya epangelo otali tula eemhumbwe dimwe komesho ngaashi oshikukuta, efundja olo la hanauna eenhele dimwe moshilongo naikwao, ashike okuudite kutya shama ashike kwa wedwa kashona opo va dule okutukulilafana noutekulu novakwanedimo vavo. 

“Ngaashi ava tu na omaumbo modoolopa, ohatu fendele omeva, olusheno, nomaumbo oovene. Ihatu fyaala po nasha vali,” Shiyuka ta ti. 

Petrina Sheehama weedula 65 naye okwa ti inava hala okuwedelwa oimaliwa ofulundudu ashike nande oN$50 otadi va kwafa ashike. 

“Ondado yoikulya ohai ende nokuwedelwa momukokomoko wodula. 

Onghene ohatu lihange itatu dulu okulanda oipumbiwa imwe yefiku keshe shaashi itatu wanifa. Ohatu li nyeke yo opendjela novatekulu vetu momaumbo,” Sheehama ta ti. 

Sheehama okwa ti ovakulupe ove likolelela ashike mopendjela onghene otava indile va wedelwe nande oN$50 ile oN$100. 

Eshi a pitifa omutengenekofaneko wemona loshilongo lomudo 2025/2026 oshivike sha dja ko, ominista yemona nopendjela Erica Shafudah okwa tula poshitaafula oshimaliwa shoN$106.3 okukandula po omaupyakadi oshilongo ashishe. 

Shafudah okwa ti oshimaliwa osha topolelwa eeministeli noikondo ya yooloka she likwatelela keemhumbwe di lili odo da wilila po oshilongo. 

-wakudumoauleria@gmail.com