OSHAKATI- Ovalumenhu vatatu ova tambulilwa moshipangelo shaShakati konima eshi va dengwa nokumonifwa oshiponga neehamala noshoyo nomakende.
Oshiningwanima osha ningwa mexuliloshivike poshitaashi shomaholi Okatana mOshakati efimbo loufiku.
Omupopiliko wopolifi moshitukulwa shaShana Chief Inspector Thomas Aiyambo okwa hokolola ta ti omulumenhu weedula 45 okwa dengwa nohamala omanga omulumenhu mukwao weedula 34 okwa dengwa nomakende eebiila.
Ota ku hokololwa kutya ovalumenhu ava okwa li tava tanguna konima eshi ongodi ya nakudengwa nohamala ya vakwa po komufekelwa oo vati aya meumbo lavo.
Okudja opo nakukudengwa nomakende okwa li ta kendabala oku ya olwoodi pokati ashike omufekelwa okwe nukila ndele te mu denge nomakende komutwe.
Omufekelwa okwa kwatwa po nota pangulilwa oshibofa shonghendabala yedipao.
Oshiningwanima shikwao shafaafana naasho omulumenhu weedula 23 okwa tambulilwa koICU moshipangelo shaShakati eshi a dengwa nokumonifwa oshiponga pefimbo a li ta amene mumwaina. Oshiningwanima osha ningwa mexuliloshivike molukanda Evululuko mOshakati efimbo loufiku.
Opolifi oya hokolola tai ti nakuninga oshihakanwa okwa pendulwa meemhofi pefimbo mumwainamati kwa li ta dengwa kovalumenhu vavali umwepo.
Okudja opo omulumenhu ou eshi a ya pondje okwa kufa oshikuni nokudenga umwepo vomovalumenhu oo kwa li tava denge mumwaina.
Ota ku hokololwa kutya nakuninga oshikanwa okwa faduka po ndele te li denge po.
Opolifi oya hokolola tai ti ovafekelwa ova nukila omulumenhu ou ndele ta dengwa noikulumbwati komutwe.
Ovafekelwa ova kwakwa po, otava pangulilwa oshibofa shonghendabala yedipawo.
Oshiningwanima shikwao, omulumenhu 38 okwe li mangeleka konima eshi vati a dipaa omukainhu waye nombele.
Oshiningwanima osha ningwa mexuliloshivike komukunda Ehafo moshitukulwa shaShana efimbo longula.
Omulumenhu oye Elia Hamukwaya omukalimo womomukunda Ehafo omanga omaukainhu oye Emilia Nangombe weedula 34 a dile komukunda Oshimumu.