Ovambanderu mOUK kehi yOmbara Tjozohongo II Nguvauva omayuva womasuviro nga zuko va woronganene motjihuro Ouigan potjitjitwa otjihimangongo tjombazu, ozomburo vozondekurona zOvambanderu mehi ndo za kwambere ko omuwonge wozombuze ngwi. 

Otjitjitwa hi tja woronganisire pamwe ouṋepo womuhoko wOvambanderu okuzemburukisasana, okuhingira owanyoro, okunyandera ombazu yawo nokupamisa oruwano nombwaneno mokati kawo. Novitjitwa vyonḓerera; outjina, omuhiva, ovihungiriro vyokupaimisa nokuṱiza ongaro novitjitwa vyomuhoko wOvambanderu. 

Amave ṱaṱere komuzaro wombazu kutja u sokuzarwa vi, okutjindwa vi nokutengwa vi momuhoko. 

Pendje novitjitwa vyombazu, omaworonganeno nga ya pere osuvaneno yokuriyaruka nokutara kozonḓoneno zorukapitaveze nokutara mondjira yokomurungu ombura ndji novyombura ndja zuko. 

Ovanarupa wina va pasanene omariro tjimuna omatetisiro wonyama nokuserekarerasana oviserekarerwa ovyo mbya kunine otjivepo tjondjoroka nouumwe noutongatima nombazu yawo. Omaworonganeno nga ya varerwe i imba mba ri po otja nge hi na maave zembi auhe ngwa ri po aa munine onyuṋe muwo tjinene mombwaneno noupamwe.