ONGWEDIVA – Ovanadolongo ava hava i komhangu yopedu mOshakati okudilila keedolongo da yooloka vati ohava file ko ondjala shaashi oshikondo shopolifi ihashi fi oshisho oku va twaalela omusha.
Vamwe vomuvo ohave lihange tava pange efiku alishe hanga konyala va idililwa meenduda di li konima yomhangulilo, oko haku kala ovanadolongo va teelela va ye momhangu.
Ovanadolongo luhapu ohava twalwa kovapolifi komhangu efimbo longula, ashike ngeenge ova hange omupanguli ile oohahende ve lipyakidila, ohava ka holoka ashike momhangu okudja po14h00.
Ovanambelewa vamwe vomomangestrata ovo va pula vaha tumbulwe komadina ova hokolola kutya ovanadolongo ohava kala ashike va idililwa konima nondjala. Vati ava ve na elao ohava etelewa ngaho okulya kovakwanedimo vavo, ashike vahapu ohava kala ashike ngaho, ta ti vamwe ove litekwa kovakwanedimo vavo.
“Vamwe vomuvo ohava nu omiti nohashi va etele va kale itava dulu okufikama eshi efimbo lomhangu tali fiki.
Oto hange umwe ita dulu nokuyandja oumbangi komesho yeehaende davo.
Vamwe omadilaadilo avo ohaa hanga a dja ponhele kondjala nohashi etifa va kale itava nyamukla eshi tava pulwa pefimbo ve li momhangu molwondjala,” omunambelewa ta ti. Omunambelwa ta yelifa kutya ovanadolongo vokomhangu yamangestalata inava fa ava hava holoka komhangu yopombada shaashi voo ohava ningilwa omalongekido opo va ye noikulya komhangu. “Ashike nande ongaho onde lineekela ope na ngaho omutengenekwafaneko woshimaliwa wa tulwa po wa nuninwa ovanadolongo ovo, ndele kandi shi kutya ohau longo naana ngahelipi,” ta weda po. Omukulunhu wopolifi moshitukulwa shaShana Naftal Sakaria okwa tumbula kutya ovatamanekwa ava hava i komhangu yopombada ohava i noikulya shaashi vati ihava kala vahapu, okuyelekanifa naava vokomanhugu yopedu.
Okwa twikila yoo kutya ava hava holoka komhangu yopedu ohava teelele ashike efimbo eli tava mane opo va dule okushuna kodolongo va ka lye omusha.