Omupedupresidente Netumbo Nandi-Ndaitwah okwa ti oshilongwa shondjokonona unene yopefimbo loita osha fimana.
Edi Nandi-Ndaitwha okwe di popya mEtivali kedimbuluko leedula 109 okudja nghene oshiwana shEembastela sha li sha ponokelwa kOvandowishi momafiku 8 Mei 1915 moRehoboth.
Pefimbo loshiponokela, vahapu voshiwana sheembaatili ova dipawa mwa kwatelwa okaana kashona.
Omudo keshe momafiku 8 Mei, Eembaatili ohadi dimbuluka efiku eli lolwoodi pokati kavo nOvandowishi.
Okwa ti eendjokonona doludi eli oda fimana ngeenge tadi longwa meefikola opo ovanafikola va kale ve na eudeko.
“Natu kalekei po eendjokonona opo tu yandje ehongo komapupi taa uya,” ta ti.
Okwa ti oshilongo shihe na ondjokonona kashi shi oshilongo.
“Ondjokonona oya fimana shaashi otai ulike efano loiningwanimwa ya ningwa pefimbo lekondjelomanguluko,” ta ti.
Omupedupresidente okwa ti ondjokonona otai yandje omhito kovanhu opo va dimbuluke omapendafule oo a kufa ombinga pefimbo lekondjelomanguluko.
Okwa kumaida oshiwana shEembaatili opo shi twikile okukala shi na oukumwe wokuyambula po odoolopa yavo.
“Longeleni kumwe okulwifa ondjala noluhepo noshoyo okukaleka po ombili modoolopa yeni,” ta ti.
Okwa ti Namibia oshilongo shi na ombili noukumwe shaashi paife osha manguluka.
Nandi-Ndaitwah okwa pandula oshiwana shEembaatili eshi she liunganeka okudimbuluka efiku eli molwaashi ola fimana mokondjokonona.
“Twikileni okudimbuluka efiku eli omudo keshe,” ta ti.
-fhamalwa@nepc.com.na