Auleria Wakudumo 

Ovanambelewa vouhaku moshitukulwa shaKunene vati inava hala okulonga koukilinika vokomikunda molwa onghalo. 

Omupopiliko wouministeli wouhaku nonghalonawa Walter Kamaya okwa holola kutya okudja muJuli neudo, oshitukulwa shaKunene oshina eemhito doilonga da fika po161. Kamaya okwa ti eemhito doilonga edi inadi kwatela mo ashike ovapangi neendokotola, ndele oda kwatela mo yoo ovanambelewa va yooloka moshikondo shouhaku. 

“Eemhito doilonga edi oda kwatela mo eemhito doilonga dapitile nale oshoyo odo opo da piti paife. Eemhito doilonga oda pitifwa kepangelo okuyambula po omwaalu wovanambelewa mouhaku moshitukulwa shaKunene,” Kamaya ta ti. 

Kamaya okwa holola kutya oshitukulwa shaKunene oshina omaimbo mahapu oo vati a imba vahapu va tambule ko oilonga komikunda. “Oukilinika vokomikunda vamwe kavena omeva, kakuna onetwork nelongifo lokomalungula osho hashi imbi omakwatafano opangodi a kale a ninipikwa neenghono,” Kamaya ta holola ngaho. 

Omupopiliko okwa holola yo kutya omhumbwe yovanambelewa vouhaku otai ii pombada shaashi ovanambelewa vouhaku unene eendokotola okudja kondje yoshilongo otadi anyenwa oukalata voilonga noNamibia kouministeli woikwameni. 

Nonande ongaho, ouministeli wouhaku owa tula moilonga omikalo dihapu opo ovanambelwa va shiive okukala tava longo momikunda vehena oudjuu ile omangongoto asha. “Ouministeli owa tula po oshimaliwa shovanambelewa ovo hava longo koushai, okutunga omaumbo ovanambelewa vokomikunda nokuvapa exungomwenyo naikwao imwe ya wedwa po,” Kamaya ta holola. 

Kamaya okwa ti ouministeli ohau ningi omayakulo a wedwa po okukwashilipaleka kutya ovo veli komikunda ova mona epango lopaunamiti. 

Okwa ti ovapangi ohava twala epango komikunda oshoyo okulongela kumwe noipandelo yakula ngaashi oshipangelo shaShakati, Katutura Windhoek Central naikwao ngeenge ovanaudu va pumbwa eendokotola ile ouhaku wopombada. Ovanambelewa vouhaku vomomikunda vamwe ova tuminwa keenhele da yooloka. Kamaya okwa ti ohava tumu yoo ovapangi vaka longe eevili da wedwa po komikunda unene oko kuna omhumbwe yovanailonga. 

Omhumbwe yovanambelewa vouhaku inava hala okukalonga komikunda oya etwa kouyelele kuNgoloneya woshitukulwa sha Kunene Vipuakuje Muharukua pefimbo ta ningi omushangwahokololo woshitukulwa shaye omafiku a dja ko. Ngoloneya okwa holola kutya oshitukulwa shaye onghene tashi twikile okukala shina omwaka wovanailonga mouhaku molwa omashongo mahapu a taalelwa moshitukulwa. 

“Eshongo lakula la tali imbi ovanambelewa vouhaku va longe komikunda, eepate. Eepate detu odili monghalo itai li didimikilwa naluhapu ohashi kala shidjuu okuya keenhele dokokule omunhu ngeenge kena oshihauto,” Muharukua ta ti. 

Muharukua okwa holola yo kutya eepate oda pumbwa okulongwa meendelelo opo omhumbwe yovanambelewa vouhaku i kandulwe po moshitukulwa. 

Ngoloneya okwa ti eshi ngeenge inashi ningwa meendelelo otave kelihanga momhumbwe ina onghambe shaashi ovakalimo vamwe otave keli hang ava patelwa kodje ngeenge tashiya kokumona ouhaku. Nonande oshitukulwa sha taalelwa komashongo atya ngaha, ouministeli owa holola kutya otau twikila okukwashilipaleka kutya owa longifa omikalo da yooloka opo keshe umwe a mone epango lopaunamiti moNamibia. 

-wakudumoauleria@gmail.com