Taimi Haihambo
ONGWEDIVA – Elelo lodoolopa yaNgwediva mekwatafano noNational Housing Enterprise ova twa kumwe mo ku tukulila ovakalimo vaNgwediva eenhele dokutunga omaumbo dili 260.
Eenhele edi da nuninwa ovamoni voiyemo yopokati naayi ini ni odili kolukanda tali ifanwa Efidi.
Mayola wodoolopa yaNgwediva Taarah Shalyefu okwa ti ovanhu ava unene hava tungilwa omaumbo oludi e li ovapolifi, ovakwaita oshoyo ovalongifikola.
“Eenhele edi oda otadi pewa ovanhu ovo veli nale momusholondodo wovanhu vaninga omaindilo oku tungilwa omaumbo nova kala va teelela efimbo lile, Ashike nande twa yandja eenhele 260, natango omusholondodo wovaningivomaindilo onghee ngaho tau twikile nokuya komesho,” Shalyefu ta ti.
Mayola okwa twikila kutya momusholondodo omo omwa dja, ashike eyandjo lomaumbo neenhele inali xuulila opo, ashike natango opena ngaho mukwao tau shikula ko.
Okwa ti elelo doloopa ola taalela omashongo mokutukula eenhele do ku tunga omalukalwa shaashi odoolopa paife oya kwatela mo omapya ashike ovanhu ina va hala oku landifapo omapya avo kumuni.
“Ovanhu ina va hala oku landifa omapya avo shaashi va ti elelo lodoolopa ohali va nyokoma. Omunhu umwe oha dulu ngaho oku futwa nande N$700 000 ile oN$800 000, ashike vahapu ihava kala lela va pandula,” Shalyefu ta ti.
Okwa ti vati epangelo ola hala oku talulula omulandu ou hau shikulwa ngeenge tashiya po ku kufuta ovanhu ava utalulwe, doo endado da vo di dule okuya pombada.
Shalyefu okwa kunghilila yoo ovalandi veenhelo meedolopa va tameke oku tunga omalukalwa avo diva, shaashi vati ovakwashiwana ohava kala tava nyenyeta nghee ovanhu modoolopa vena ashike omaumbo afa eliteekwa.
“Omaumbo mahapu aa hamakala meedolopa eli meenghalo ita di monika nawa, luhapo oha a kala ovanhu ava valanda nande omaumbo eli atatu ile ane ndele omunhu ta nyengwa okumana okutunga, omanga pena ovanhu vahala omaumbo. Shike nande ongaho she kashili panghatu yetu shaashi shee modoolopa ohatu landifa ashike eumbo limwe komunhu, ava hava kala vena omaumbo a koya pulimwe ongeenge omunhu a landa ina pitila kelelo dooolopa,” Mayola ta ti.
– taimihaihambo2000@gmail.com