Taimi Haihambo 

OKALONGO – Kansela woshikandjohoololo shaKalongo moshitukulwa shaMusati, Makana Iipinge okwa ti fiyo opapa ovanhu ve li 2 000 moshitukulwa shaye ove ke lishangifa oukalata vomahoololo. 

Iipinge ta ti nonande ope na ovanhu vamwe tava hongolola oshiwana shiha ka hoolole, oshoongalele osho a li a ninga osha eta opo vamwe va lundulule omadiladilo avo ndele tave ke lishangifa. 

Kansela okwa ti okwa pandula oshiwana eshi she liufa kamalombwelo aye opo shi ka kufe ombinga mokuhoolola kansela wavo. 

Oshivike sha dja ko Iipinge okwa li a ongaleka oshiwana moshitukulwa osho oku shi lombwela kombinga yefimano lomalishangifo omahoololo. 

Iipinge eshi kwe shi ninga konima eshi a kundana kutya ovanhu vape ve lishangifa moshikandjohoololo momashango a wedwa po okwa li ashike ve li 242. 

Oshoongalele osha li sha nuniwa okuudifa ko ovakwashiwana kutya Onandjaba paife oya ninga elelo lopamukunda novanhu ove li pondodo yokuhoolola paife. 

Ashike nande ongaho, vamwe vomwaavo va li poshoongalele ova ti ove shi nawa pondodo apa pa fikama Onandjaba, ashike ova li va dika eenyala medu kutya vo itava hoololola, tava ti vo ova loloka okuhoololela exumokomesho vehe li wete. Ova ti yo emono loixuna lokuhamona oshikukuta onghee ngaho tali twikile, nomhumbwe yokupewa eenhele dokutunga omalukalwa onghee ngaho tai twikile. 

Kansela Iipinge okwa ti ye okuudite kutya ovanhu eshi inava hala okufanekwa osheshi va li vehe edutite kutya paife Onandjaba oya tulwa pamufika welelo lopamukunda, nove na oufemba wokukufa ombinga momahoololo ookansela. 

-taimihaihambo2000@gmail.com