ONGWEDIVA- Ovanhu ve na oulema woshipa otava ka ningilwa omakonakono nelalakano lokutalwa ngeenge ove na omikifi donhumba. 

Edi oda popiwa komupedupresidente wehangano lovanhu ve na oulema woshipa moNamibia, Walde Kambambi onghela. 

Omakonakono otaa ka ningwa omafiku 10 fiyo 11 Juni koshipangelo shaShakati nokoshipangelo sha Central koWindhoek. 

Okwa pula ovadali tava tekula ounona ile ovo va idilila ovakwapata vavo ve na oulema woshipa opo va longife omhito ei yokuvatwalwa koshipangelo. 

“Omakonakona aa okwa fimana kovanhu ve na oulema woshipa. Oshiwana okudja koitukulwa ya yooloka na shi tandaveleke etumwalaka eli,” ta ti. Okwa weda po ta ti ounona nava longekidwe pefimbo shaashi ovo unene va ninga oihakanwa yokuninga oipute. 

“Omakonakono aa otaa etele ovanhu ouwa ngaashi okupangwa oipute, okueta po ouyelele kutya omunhu okwa opumbwa omaadi oshipa elipipo,” ta ti. 

Kambambi okwa ti konima ngeenge omakonakono okwa pu ovanhu ovo tava ka monika omikifi donhumba otava ka pangwa okudja omafiku 22n fiyon 26 Juni. 

“Elalakano okukwashipaleka kutya ovanhu ve na oulema woshipa ove na oukolele,” a weda po. Okwa ti ovanhu ve na oulema woshipa ova fimana ngaashi naana ovanhu aveshe ve li moshilongo. Okwa yelifa ta ti omudo keshe ovanhu ve na oulema woshipa ohava ningilwa omakonakono. “Onda pandula epangelo eshi ta li twikile okufiila oshisho ovanhu ve na oulema woshipa,” ta ti.Okwa ti ombelewa yaye melongelokumwe nepangelo osho yo omahangano a yooloka, otai twikile okuyandjaneka omambele, omaadi okuvava osho yo omakende omutenya okuamena oshipa shavo. Kambambi okwa ti omafiku 13 Juni ota ku kadimbulukiwa efiku lovanhu ve na oulema woshipa mounyuni koshipangelo shaShakati.“Efiku e li ola fimana moshilongo okuyandja efimaneko nokuulika ohole kovanhu ve na oulema woshipa,” ta ti. 

Okwapula Ovanamibia opo va twikile okuulika ohole nokufimaneka ovanhu ve na oulema woshipa. 

fhamalwa@ nepc.com. na