Auleria Wakudumo
OHANGWENA – Dimwe domeeproyeka dovanyasha moshitukulwa shaHangwena, dali da pewa oimaliwa kepangelo okupitila mouministeli womaudano noipambele yovanyasha otadi shi endifa nawa.
Eeproyeka oda kwatela mo okufoloma nokutunga, ounafaalama,okuxwikila nokulonga noipilangi.
Pefimbo okakomitee koNational Council Standing Committee kelile po oipambele yelongo, oudindoli, oikwamalungula neeproyeka dovanyasha oka mona nghene ovanyasha moshitukulwa tave shi endifa.
Ocommitte oke kwetelwe komesho komunashipundi Olivia Hanghuwo novanashipundi vakwao vatano, (Bethuel Tjaveondja, Kosmos Katura, Jeremias Goeieman, Deriou Benson oshoyo Sakeus Nangula).
Immanuel Johannes okudja koshikandjohololo Oshikango okwati okwa kwafelwa N$103 000 opo va tote ongeshefa yokulonga noipilangi.
“Otwa pandula epangelo eshi letupa omhito ei tu dule okulilongela fye vene, tu mone oyuuyemo,” Johannes ta ti.
Johannes okwati ongeshefa oya kwatela mo ovanangeshefa vahamano, mwa kwatelwa ovakainhu vavali.
“Otwa pewa omhito opo tu li kongele oilonga onga ovanyasha moshitukulwa shaHangwena,” Johannes ta ti.
Okwati ova tengeneka va tameke omwedi tauya, tava longo oipundi, oitaafula, eeskopa nai kwao ya wedwa po. Nande ongaho, Johannes okwati ova pumbwa natango oshimaliwa opo va lande oipumbiwa imwe ya wedwa po.
Oproyeka yeedopi mewiliko la Samuel Shimwefeleni navakwao vanhe moshikandjohololo shaNdobe, ova holola kutya oproyeka vati oya lundulula eenghalamwenyo davo.
Shimwefeleni okwati ohava landifa eedopi kovakwashiwana tava landifa ko N$4.50 odopi imwe.
Ongeshefa yavo vati oya mona oshimaliwa N$350 000 okudja kouministeli womaudano odula yadjako.
“Ongeshefa ota i ende nawa nohatu mono ovalandi efiku nefiku va hala okutunga,” Shimwefeleni ta ti.
Shimwefeleni okwa twa ovanyasha omukumo opo va konge omakwafo okudja keeministeli da yooloka odo tadi kwafele ovanyasha okutota eengeshefa davo.
“Ou omukalo uwa okushunifa monima okuhena oilonga moshilongo nokulwifa oluhepo movanyasha,” Shimwefeleni ta ti.
Omukwateli komesho woka Committee Olivia Hanghuwo okwa yandja olupandu kovanyasha ava tava longifa oimaliwa yepangelo ngaashi ina okulongifwa.
Hanghuwo okwati ekwatafano pokati kovanyasha vena eeprojeka nouministeli woipambele yovanyasha ola pumbwa okukala la kola, tava pukulula ovanyasha opo va dule okukala tava longifa oimaliwa noukeka va hange omalalakano avo nomalalakano epangelo.
Ngoloneya woshitukulwa shaHangwena, Sebastian Ndeitunga okwati nonande ovanyasha vamwe tava longifa oimaliwa yepangelo ngaashi sha ufwa, okwati okwa uda nayi koikandjohololo imwe moshitukulwa omo ovanyasha va pewa oimaliwa ndele inave yi longifa pamukalo.
Ndeitunga okwa yandja oshihopaenenwa shoproyeka Onehanga Youth Enterprise moshitukulwa shaye.
Oimaliwa yepangelo oya pewa ovanyasha va kwafelwe mokutota po eengeshefa davo ashike dimwe otadi longifa oshimaliwa nai.
Ndeitunga okwati eengeshefa tadi mono ekwafo kepangelo nadi kondjife okuhanga omalalakano epangelo.